Day: January 24, 2022

पुणे : भारतीय स्वातंत्र्याच्या अमृत महोत्सवाचा एक भाग म्हणून सांस्कृतिक मंत्रालय आणि संरक्षण मंत्रालयाच्या संयुक्त विद्यमाने ‘वंदे भारतम् – नृत्य उत्सव’ ही अखिल भारतीय नृत्य स्पर्धा आयोजित करण्यात आली होती. या राष्ट्रीय स्तरावरील नृत्यस्पर्धेत पुण्यातील नृत्यगुरू मंजिरी कारूळकर यांच्या रूपक नृत्यालयातील विद्यार्थिनींनी ‘त्रिवट’ ही कथक नृत्यरचना सादर केली होती. दि. 26 जानेवारी 2022 रोजी दिल्लीत राजपथावर होणार्‍या संचालनात रूपक नृत्यालयातील विद्यार्थिनींना नृत्य सादरीकरणाची संधी मिळाली आहे. या कथक नृत्य संघात प्राची श्रीकांत पुजारी हिच्यासोबत शांभवी शेटे, मधुरा पासलकर, मयुरी गोडबोले, ऋचा कुलकर्णी, भार्गवी गोसावी, अवनी चांदोरकर, वैदेही खळदकर, उर्वी हडप व अनायता मेहता या नृत्य कलाकारांनी स्पर्धेत शास्त्रीय नृत्य प्रस्तुती सादर केली होती. हाच संघ राजपथावरील संचलनात सहभागी होणार असून नृत्यप्रस्तुती करणार आहे. देशभरातील सर्वोत्तम नृत्य प्रतिभा निवडणे, निवड झालेल्या कलावंतांना प्रजासत्ताक दिनानिमित्त दिल्लीतील राजपथावर होणार्‍या संचलनात सांस्कृतिक कार्यक्रमादरम्यान स्वप्रतिभेचा आविष्कार सादर करण्याची संधी मिळावी हा या आयोजनामागील हेतू आहे. भारतीय युवा पिढीने आपला समृद्ध वारसा जपताना संस्कृतीशी त्यांचे नाते घट्ट जोडले जावे हा आयोजकांचा हेतू आहे, असे मंजिरी कारूळकर यांनी सांगितले. या स्पर्धेत शास्त्रीय, लोकनृत्य, आदिवासी आणि फ्युजन/कंटेम्पररी या चार नृत्य प्रकाराचा समावेश करण्यात आला होता. ही स्पर्धा जिल्हा/राज्य/विभागीय आणि राष्ट्रीय स्तर अशा चार टप्प्यात विभागण्यात आली होती. राष्ट्रीय स्तरावरील स्पर्धेत देशातील 28 राज्यातून 2400 कलाकार व 200 पेक्षा जास्त संघ सामील झाले होते. भारतीय स्वातंत्र्याच्या अमृत महोत्सवानिमित्ताने दि. 26 जानेवारी 2022 ला प्रजासत्ताक दिनानिमित्त राजपथ, दिल्ली येथे होणार्‍या संचलनात नृत्य सादर करण्यासाठी रूपक नृत्यालयासह 36 संघांची व 480 कलाकारांची निवड करण्यात आली आहे.