आता डॉक्टरांच्या चिठ्ठीशिवाय करता येणार कोरोना चाचणी

देशात झपाट्याने वाढणाऱ्या कोरोना संसर्गास आळा घालण्यासाठी, भारत सरकारने कोरोना चाचणीच्या धोरणात मोठा बदल केला आहे. पूर्वी डॉक्टरांच्या प्रिस्क्रीप्शन शिवाय लोकांना आपली कोरोना चाचणी करून घेता येत नव्हती. मात्र,आता जर कुणाला कोरोना चाचणी करून घ्यायची असेल, तर यासाठी डॉक्टरच्या प्रिस्क्रीप्शनची गरज लागणार नाही. केंद्रीय आरोग्य मंत्रालयाने कोविड-१९ टेस्टिंग संदर्भातील ऍडव्हाझरीमध्ये काही बदल केले आहेत.

ज्यानुसार लोकांना ऑन-डिमांड टेस्टिंगची सुविधा उपलब्ध करून दिल्या जात आहे. त्यामुळे आता डॉक्टरच्या प्रिस्क्रीप्शन शिवाय कोविड-१९ टेस्ट करता येणार आहे. याशिवाय असे व्यक्ती जे प्रवास करत आहेत आणि आपली टेस्ट करून घेऊ इच्छित आहेत. ते देखील ऑन-डिमांड कोविड -१९ टेस्ट करून घेता येऊ शकते.

आतापर्यंत देशात जिल्हा वैद्यकीय अधिकाऱ्यांच्या आदेश, डॉक्टरांचे प्रिस्क्रीप्शन किंवा परिसरात प्रशासनाद्वारे करण्यात येणाऱ्या तपासण्या दरम्यान कोविड-१९ साठी टेस्टिंग करता येत होते. मात्र, आता केंद्रीय आरोग्य मंत्रालयाद्वारे कोविड- १९ टेस्टिंगमध्ये केलेल्या या बदलानंतर आता कुणालाही डॉक्टरांच्या प्रिस्क्रीप्शन शिवाय ऑन-डिमांड करोना टेस्टिंग करून घेणे शक्य होणार आहे.

या निर्णयानंतर ज्यांनी मागील १४ दिवसांमध्ये आंतरराष्ट्रीय प्रवास केला आहे. त्यांच्यातील लक्षणे असणाऱ्या व्यतिरिक्त देखील सर्व लोकांची चाचणी केली जाईल. एखाद्या दुसऱ्या राज्याचा किंवा देशाचा प्रवास करणाऱ्यांसाठी कोविड -१९ निगेटिव्ह असणे गरजेचे आहे. या संपूर्ण प्रक्रिये दरम्यान आरोग्य विभागाद्वारे कॉन्टॅक्ट ट्रेसिंग आणि ट्रॅकिंगची मदत घेतली जाणार असल्याचे सांगितले जात आहे.