45 वर्षापुढील मानसिक दिव्यांगांसाठी काय करता येईल याबाबत दीर्घाकालीन योजना आखण्याची गरज – महापौर मंजुषा नागपुरे.

पुणे : सेवासदन संस्थेची दिलासा कार्यशाळा ही 18 ते 45 वयोगटातील प्रौढ मानसिक दिव्यांगांना प्रशिक्षण देऊन त्यांनी बनविलेल्या विविध वस्तू व खाद्य पदार्थांच्या विक्रीतून त्यांना स्वावलंबी बनविते हे कौतुकास्पद असल्याचे मत महापौर मंजुषा नागपूरे यांनी व्यक्त केले. मात्र 45 वर्षापुढील मानसिक दिव्यांगांसाठी काय करता येईल याबाबत योजना आखण्याची गरज असल्याचे सांगतानाच त्यासाठी “विशेष व्यक्तींसाठी” कार्यरत असणाऱ्या संस्थांच्या मदतीने, सी एस आर किंवा मनपा तर्फे काय करता येईल याबाबत मी पुढाकार घेईन असेही महापौर मंजुषा नागपुरे म्हणाल्या.
राजकारणाची पातळी कितीही घसरली तरी आपण आपले कामं करत रहायचे आणि क्रिएटिव्ह फाउंडेशन च्या माध्यमातून संदीप आणि मंजुश्री खर्डेकर दाम्पत्य करत असलेले कार्य कौतुकास्पद आहे असे उद्गार मा. महापौर मंजुषा नागपुरे यांनी काढले. तसेच पेंशन ही हजार दोन हजार रुपये असते ती दिव्यांगांसाठी तुटपुंजी ठरेल म्हणून दीर्घाकालीन उपाय शोधण्याचा प्रयत्न करूयात असेही त्या म्हणाल्या.
क्रिएटिव्ह फाउंडेशन च्या वतीने सेवासदन च्या दिलासा कार्यशाळेस विविध उपयोगी साहित्याची मदत त्यांच्या हस्ते देण्यात आली त्या वेळी त्या बोलत होत्या. या वेळी क्रिएटिव्ह फाउंडेशन चे अध्यक्ष संदीप खर्डेकर, विश्वस्त व नगरसेविका मंजुश्री खर्डेकर,क्रिएटिव्ह फाउंडेशन चे विश्वस्त प्रतीक खर्डेकर,नगरसेवक पुनीत जोशी,प्रशांत हरसूले,ऍड. प्राचीताई बगाटे,सेवासदन संस्थेचे सरचिटणीस चिंतामणी पटवर्धन, सहसचिव अर्चना शहाणे,
व्यवस्थापिका मेघनाताई जोशी,वैभव जमदाडे,योगेश कर्पे, केतकी कुलकर्णी, संगीता शेवडे, रुपाली मगर, समीर ताडे,रुक्मिणी ताम्हाणे, जयश्री घाटे, बापू गोहाड,भाजपा चे प्रभाग 29 चे पदाधिकारी व कार्यकर्ते उपस्थित होते.
यावेळी प्रास्ताविक करताना संदीप खर्डेकर यांनी सांगितलं की सध्या राजकारणाची पातळी घसरत चालली असून राजकारणासाठी मुद्द्यांवर विरोध न राहता तो आता वैयक्तिक विरोधाच्या पातळीवर पोहचला असून एकमेकांना बदनाम करणे, वैयक्तिक उणी दुणी काढणे सुरु आहे.
अश्या वातावरणात ईशभक्ती आणि मनःशांती साठी समाजकार्य हा सर्वोत्तम पर्याय असल्याचे ही संदीप खर्डेकर यांनी नमूद केले.
पुनीत जोशी यांनी पं. दीनदयाळ उपाध्याय यांना अपेक्षित असलेल्या अंत्योदय प्रमाणेच क्रिएटिव्ह फाउंडेशन व भाजपा कार्यकर्ते कार्यरत आहेत असे नमूद केले.
सौ. मंजुश्री खर्डेकर यांनी क्रिएटिव्ह फाउंडेशन च्या कार्याची माहिती देताना ” आम्ही राजकारणापेक्षा समाजकारणावर भर देतो” हे सांगतानाच समर्थ पथावरील शक्ती 98 चौकात मनपा च्या सहकार्याने कायम स्वरूपी दिव्यांगांनी बनविलेल्या वस्तूंचे विक्री केंद्र मी उभारले असल्याचे सांगितले.
भाजपा च्या प्रभाग 29 च्या अध्यक्ष ऍड. प्राची बगाटे यांनी सर्व पदाधिकाऱ्यांसह महापौरांचा सत्कार केला तर ह्या वेळी संस्थेच्या वतीने चिंतामणी पटवर्धन, अर्चना शहाणे व मेघना जोशी यांनी महापौरांचा सत्कार केला.
आजच्या कार्यक्रमात सेवासदन दिलासा कार्यशाळेस सतरंज्या, प्रेशर कुकर, कढया, डबे, मास्क, ग्लोव्हज व इतर वस्तू भेट देण्यात आल्या व पुढील आर्थिक वर्षात अधिक मदत करू असे संदीप खर्डेकर यांनी जाहीर केले. मनपा ने ज्येष्ठ नागरिक संघ, वृद्धाश्रम, दिव्यांग पुनर्वसन केंद्र, हास्यक्लब अश्यांना वस्तू रुपी मदतीसाठी तरतूद करावी ह्या मागणीचा ही खर्डेकर यांनी पुनरूच्चार केला.
महापौरांनी मुलांमध्ये मिसळून भारत माता की जय, वंदे मातरम, जय भवानी जय शिवाजी, जय श्रीराम अश्या घोषणा दिल्या त्यास सर्वांनी उत्स्फूर्त प्रतिसाद दिला.