Day: March 15, 2026

पुणे: उत्कृष्ट समन्वय, तत्परता आणि मानवतेचा सुंदर संदेश देत डीपीयू सुपर स्पेशालिटी हॉस्पिटल, पिंपरी, पुणे आणि महाराष्ट्र पोलिस विभाग यांच्या संयुक्त प्रयत्नांतून ठाण्यातील किम्स हॉस्पिटलमधून दात्याचे फुफ्फुस पुण्यातील डीपीयू सुपर स्पेशालिटी हॉस्पिटलमध्ये ग्रीन कॉरिडॉरद्वारे सुरक्षितपणे आणि वेळेत पोहोचवण्यात आले. एखाद्या रुग्णाला नवजीवन देणाऱ्या या अमूल्य अवयवाची गुणवत्ता टिकवून ठेवण्यासाठी ही वाहतूक निर्धारित वेळेत पूर्ण करण्यात आली असून त्यामुळे रुग्णालयातील ५०वे हृदय–फुफ्फुस प्रत्यारोपण शक्य झाले आहे. १२ मार्च रोजी काटेकोर नियोजन आणि अचूक समन्वयातून दात्याच्या फुफ्फुसांची सुरक्षित वाहतूक करण्यात आली. किम्स हॉस्पिटल, ठाणे येथून डॉक्टर आणि सहाय्यक कर्मचाऱ्यांची टीम सकाळी १०.१५ वाजता निघाली आणि अवघ्या दोन तास २५ मिनिटांत म्हणजेच दुपारी १२.४० वाजता ही फुफ्फुसे डीपीयू सुपर स्पेशालिटी हॉस्पिटलमध्ये पोहोचली. वेळेशी सुरू असलेल्या या शर्यतीत मिळालेल्या यशामुळे अत्यंत गंभीर आजाराने ग्रस्त असलेल्या रुग्णावर जीव वाचवणारे फुफ्फुस प्रत्यारोपण करणे शक्य झाले असून त्याला नव्या आयुष्याची आशादायी संधी मिळाली आहे. पिंपरी–चिंचवडचे प्रादेशिक परिवहन अधिकारी संदीप चव्हाण, उपप्रादेशिक परिवहन अधिकारी राहुल जाधव, ठाण्याच्या प्रादेशिक परिवहन अधिकारी हेमांगिनी पाटील आणि उपप्रादेशिक परिवहन अधिकारी रोहित कटकर यांच्या मार्गदर्शनाखाली महत्त्वपूर्ण अवयवाच्या जलद वाहतुकीसाठी ग्रीन कॉरिडॉर यशस्वीपणे तयार करण्यात आला. ठाणे आणि पिंपरी–चिंचवड प्रादेशिक परिवहन कार्यालय तसेच पिंपरी–चिंचवड पोलिस विभाग यांच्या समन्वयातून हा अवयव नियोजित वेळेत पुण्यात पोहोचवण्यात आला. त्यामुळे अत्यावश्यक प्रत्यारोपण प्रक्रिया पार पडून एका रुग्णाला नवजीवन मिळण्याचा मार्ग मोकळा झाला. या संपूर्ण मोहिमेत सहभागी पोलिस कर्मचारी, वैद्यकीय पथक आणि सहाय्यक कर्मचाऱ्यांनी उत्कृष्ट समन्वय आणि तत्परता दाखवत दात्याच्या फुफ्फुसांची सुरक्षित व वेळेत वाहतूक सुनिश्चित केली. डीपीयू सुपर स्पेशालिटी हॉस्पिटलच्या समर्पित टीमने ग्रीन कॉरिडॉर आणि अवयव समन्वयाची जबाबदारी सांभाळली. या टीममध्ये डॉ. आशिष डोळस, डॉ. राहुल केद्रे, वाल्मिक (ओटी नर्स), निखिल लाकी (परफ्युजनिस्ट), अरुण (ट्रान्सप्लांट कोऑर्डिनेटर) आणि विशाल पाटील (तंत्रज्ञ) यांचा समावेश होता. त्यांच्या एकत्रित प्रयत्नांमुळे ही जीवन वाचवणारी आणि आशेचा किरण देणारी मोहीम यशस्वी ठरली. डॉ. डी. वाय. पाटील विद्यापीठ (अभिमत विद्यापीठ), पिंपरी, पुणे चे कुलपती मा. डॉ. पी. डी. पाटील म्हणाले, “अशा जटिल अवयव प्रत्यारोपण आणि प्रगत शस्त्रक्रिया यशस्वीपणे पार पाडण्यात आमचे रुग्णालय आघाडीवर आहे, ही आमच्यासाठी अत्यंत अभिमानाची बाब आहे. आमच्या डॉक्टरांच्या उत्कृष्ट टीमने दाखवलेले समर्पण आणि उल्लेखनीय प्रयत्नांबद्दल मी त्यांचे मनःपूर्वक अभिनंदन करतो. डीपीयू सुपर स्पेशालिटी हॉस्पिटलमध्ये अत्याधुनिक सुविधा आणि तंत्रज्ञानाच्या मदतीने अधिकाधिक जीव वाचवणाऱ्या प्रक्रिया राबवण्याचा आमचा निर्धार कायम आहे.” तसेच डॉ. डी. वाय. पाटील विद्यापीठ (अभिमत विद्यापीठ), पिंपरी, पुणे चे प्र–कुलपती मा. डॉ. भाग्यश्री पी. पाटील, म्हणाल्या, “अवयवदानाबाबत समाजात अधिक जागरूकता निर्माण व्हावी आणि त्यातून अनेकांचे जीव वाचू शकतात हा संदेश लोकांपर्यंत पोहोचावा, ही माझी नेहमीच भूमिका आणि दृष्टी राहिली आहे. आमच्या डॉक्टरांच्या टीमने त्यांच्या अथक परिश्रम, कठोर मेहनत आणि रुग्णसेवेप्रती असलेल्या निष्ठेमुळे हे स्वप्न प्रत्यक्षात आणण्यात महत्त्वाची भूमिका बजावली आहे. त्यांच्या कार्याचा मला मनापासून अभिमान आहे आणि येत्या काळातही अशाच प्रकारे अनेकांच्या जीवनात सकारात्मक बदल घडवून आणण्याची आम्हाला आशा आहे.”