डॉ. मीना वैशंपायन यांना महाराष्ट्र साहित्य परिषदेचा डॉ. गं. ना. जोगळेकर पुरस्कार 

प्रा. जोशी म्हणाले, ज्येष्ठ लेखिका डॉ. मीना वैशंपायन यांनी ‘द एशियाटिक सोसायटी ऑफ मुंबई’ या संस्थेत चौदा वर्षांहून अधिक काळ मानद उपाध्यक्ष व सचिव म्हणून प्रशासकीय व संशोधनात्मक काम केले. स्वलिखित, संशोधित, अनुवादित आणि संपादित अशी त्यांची वीस पुस्तके प्रकाशित आहेत. दुर्गा भागवत यांच्या साहित्याच्या संशोधनात्मक संपादनाची त्यांची सहा पुस्तके प्रकाशित झाली आहेत. दुर्गाबाई भागवत यांच्या ललितगद्याचा दृक् प्रत्ययवादी दृष्टिकोनातून चिकित्सक अभ्यास हा त्यांच्या प्रबंधाचा विषय होता. सरस्वती सन्मान या राष्ट्रीय पुरस्कार निवड समितीच्या सदस्य म्हणूनही त्यांनी काम केले.

डॉ. वैशंपायन यांनी केलेले संस्थात्मक काम, लेखन आणि संशोधन यांचा या पुरस्काराच्या रूपाने सन्मान करताना परिषदेला आनंद व समाधान वाटत आहे.