ॲक्सिस बँकेतर्फे ‘लॉक एफडी’ सुविधा सादर; मुदत ठेवींना डिजिटल फसवणुकीपासून संरक्षण देणारी बॅंकिंग उद्योगातील पहिली सुविधा
मुंबई : भारतातील आघाडीच्या खासगी बँकांपैकी एक असलेल्या ॲक्सिस बँकेने ‘लॉक एफडी’ ही एक नाविन्यपूर्ण आणि उद्योगातली पहिली सुविधा सुरू केल्याची घोषणा आज येथे केली. ग्राहकांच्या मुदत ठेवींना वाढत्या डिजिटल फसवणुकीपासून सुरक्षित ठेवण्यासाठी ही सुविधा तयार करण्यात आली आहे. बँकेच्या ‘ओपन’ या मोबाइल अॅपवर आणि सर्व शाखांमध्ये ही सुविधा उपलब्ध असून, ग्राहकांना मोबाइल किंवा इंटरनेट बँकिंगसारख्या डिजिटल माध्यमांद्वारे मुदत ठेव अकाली बंद करता येऊ नये, यासाठी हे एक अतिरिक्त सुरक्षा कवच देण्यात आले आहे.
‘लॉक एफडी’ ही सुविधा ग्राहकांच्या मुदत ठेवींना डिजिटल फसवणुकीपासून वाचवण्यासाठी आणलेली एक सुरक्षा यंत्रणा आहे. या सुविधेसाठी निवड करणाऱ्या ग्राहकांना त्यांची मुदत ठेव अकाली बंद करायची असल्यास थेट बँकेच्या शाखेत जावे लागेल. एकदा ठेवीवर लॉक लावल्यास डिजिटल प्लॅटफॉर्मवरून ती बंद करण्याची सुविधा उपलब्ध राहणार नाही. ग्राहकांनी बॅंकेच्या शाखेत जाऊन ओळखीची तपासणी करून घेतल्यावर त्यांच्या मुदत ठेवींवर प्रक्रिया करण्यात येईल. यामुळे त्यांच्या ठेवींमध्ये अनधिकृतरित्या हस्तक्षेप होण्याचा धोका कमी होईल. ही सुविधा विशेषतः अशा ग्राहकांसाठी उपयुक्त आहे, जे डिजिटल प्लॅटफॉर्मचा कमी वापर करतात किंवा ज्यांना अशा माध्यमांतील फसवणुकीचा धोका अधिक असतो.
ॲक्सिस बँकेच्या डिजिटल बिझनेस, ट्रान्सफॉर्मेशन आणि स्ट्रॅटेजिक प्रोग्रॅम्स या विभागांचे ग्रुप एक्झिक्युटिव्ह समीर शेट्टी म्हणाले, “ॲक्सिस बँकेत आम्ही डिजिटल उपाययोजनांमध्ये सतत गुंतवणूक करीत असतो. त्यामुळे सुरक्षित आणि अखंड बँकिंगचा अनुभव ग्राहकांना मिळतो. या प्रयत्नांचा एक भाग म्हणून आम्ही ‘लॉक एफडी’ ही सुविधा सादर करत आहोत. वाढत्या डिजिटल फसवणुकीला आमच्याकडून दिलेले हे एक खणखणीत उत्तर आहे. या सुविधेमुळे ग्राहकांच्या मुदत ठेवींमध्ये अनधिकृत व डिजिटल हस्तक्षेप होण्यापासून संरक्षण मिळते. ग्राहकांची फसवणूक करून त्यांच्या ठेवींमधील निधी चोरून नेण्याचा चोरट्यांचा मार्ग बंद करून आम्ही ग्राहकांचे पैसे आता अधिक सुरक्षित करू शकतो.”
‘लॉक एफडी’ ही सुविधा ॲक्सिस बँकेच्या सर्व ग्राहकांसाठी उपलब्ध असून, ती ॲक्सिस बँकेच्या मोबाइल अॅपवरून किंवा कोणत्याही शाखेतून सक्रिय करता येते. ॲक्सिस बँकेने अलीकडेच आपल्या मोबाइल अॅपवर ‘इन अॅप मोबाइल ओटीपी’ ही सुविधादेखील सुरू केली आहे. ग्राहकांची प्रमाणीकरणाची सुरक्षितता यातून अधिक बळकट होते आणि ओटीपीशी संबंधित वाढत्या फसवणुकींपासून ग्राहकांचे संरक्षण होते. डिजिटल फसवणुकीविरोधात लढा देत असताना ग्राहकांचा डिजिटल अनुभव अधिक समृद्ध करणे हा या सर्व उपक्रमांचा उद्देश आहे. म्हणूनच सुरक्षा क्षेत्रात ॲक्सिस बँक अग्रणी ठरते.