Day: November 25, 2023

‘झी टीव्ही’ वाहिनी प्रेक्षकांपुढे एक अशक्य वाटणारी नवी प्रेमकथा घेऊन येत आहे, जिचे नाव आहे ‘कैसे मुझे तुम मिल गये’. यात गुणी अभिनेत्री सृती झा ही अमृताची भूमिका साकारणार असून आकर्षक व्यक्तिमत्त्वाचा अभिनेता अर्जित तनेजा हा विराटची भूमिका रंगविणार आहे. या दोन्ही व्यक्तिरेखांचे स्वभाव एकमेकांच्या अगदी विरुध्द असल्यामुळे जेव्हा ते दोघे एकमेकांना भेटतात, तेव्हा दोन विरोधी विश्वांची होणारी टक्कर प्रेक्षकांना पाहायला मिळेल. अमृता ही एक आशावादी आणि रोमॅन्टिक स्वभावाची मराठी मुलगी असते. प्रेमाच्या ताकदीवर आणि अर्थपूर्ण जीवनसाथीच्या पवित्र सहजीवनावर तिचा गाढ विश्वास असतो. तर विराट हा एक जोशीला पंजाबी मुंडा (तरूण) असतो. सर्व मुली या फक्त पैशाच्या मागे असतात, अशी त्याची समजूत झालेली असते आणि म्हणून त्याचा विवाह संस्थेवर विश्वास नसतो. मुक्ता धोंड यांची निर्मिती असलेल्या या मालिकेच्या कथानकाला विविध पदर असून त्यामुळे कथानकाला कधी अकस्मात कलाटणी मिळते. त्यामुळे प्रेक्षकांमध्ये मालिकेबद्दलची उत्कंठा वाढत जाते. मालिकेची झलक आणि ट्रेलर यांना मिळालेल्या प्रचंड प्रतिसादानंतर सृती झा हिने पडद्यावरील आपली आई झालेल्या हेमांगी कवी हिच्याबरोबर केलेल्या पिंगा नृत्याचा व्हिडिओ सामाजिक माध्यमांवर प्रसृत केला आहे. त्यात सृतीने काष्टा काढलेली नऊवारी साडी नेसली असून एका मराठमोळ्या रूपात तिला पाहताना तिच्या चाहत्यांना विलक्षण आनंद होईल. सृती झा म्हणाली, “कैसे मुझे तुम मिल गये मालिकेच्या चित्रीकरण हे माझ्यासाठी आतापर्यंत एक वरदान ठरलं आहे. अलिकडेच आम्ही पिंगा गाण्यावर एका नृत्याचं चित्रीकरण केलं. त्या गाण्यावर नृत्य करताना मला खूपच मजा आली. हिमांशू, सुशांत आणि त्यांच्या टीमने या गाण्यासाठी केलेलं नृत्यदिग्दर्शन हे फारच उत्कृष्ट आहे, असं मला वाटतं. पण या गाण्याच्या चित्रीकरणातील सर्वात खास भाग म्हणजे काष्टा काढलेली नऊवारी साडी नेसणं आणि हेमांगीबरोबर त्यावर नृत्य करणं. आमच्या दोघींमध्ये खूपच समजूतदारपणाचं नातं निर्माण झालं असून त्यामुळे तिच्यावर नृत्य करताना मला खूपच धमाल आली.” ‘कैसे मुझे तुम मिल गये’च्या प्रसारणाची प्रेक्षक आतुरतेने प्रतीक्षा करीत असताना सृती झाने केलेले अफलातून पिंगा नृत्य ही प्रतीक्षा अधिकच उत्कंठावर्धक करील, यात शंका नाही.