नवनाथ वाघमारे यांच्या वादग्रस्त वक्तव्याने मराठा समाजात संताप

जालना : मराठा आरक्षणाच्या प्रश्नावरून मराठा आणि ओबीसी समाजामध्ये तणावाचे वातावरण असतानाच ओबीसी नेते नवनाथ वाघमारे यांच्या वादग्रस्त वक्तव्यामुळे नव्या वादाला तोंड फुटण्याची शक्यता निर्माण झाली आहे. वाघमारे यांच्या भाषणातील काही भागाचा व्हिडीओ सोशल मीडियावर मोठ्या प्रमाणात प्रसारित होत असून, त्यांच्या वक्तव्यावर मराठा समाजातून तीव्र नाराजी व्यक्त केली जात आहे.
वाघमारे यांनी एका जाहीर भाषणात ओबीसी समाजातील मंत्री आणि नेत्यांच्या कुटुंबांमध्ये मराठा समाजातील मुलींचे विवाह झाल्याचा संदर्भ देत आक्षेपार्ह स्वरूपाचे विधान केल्याचे व्हिडीओत दिसून येते. विशेषतः मराठा मुली ओबीसी समाजातील कुटुंबांमध्ये आर्थिक परिस्थिती आणि तरुणांच्या व्यक्तिमत्त्वामुळे आकर्षित होऊन विवाह करतात, असा दावा त्यांनी केल्याचे समोर आले आहे.

मंत्री चंद्रशेखर बावनकुळे यांनी त्यांच्या कुटुंबातील वैवाहिक संबंधांचा उल्लेख केल्याच्या पार्श्वभूमीवरही वाघमारे यांनी भाष्य केले. केवळ एका नेत्याच्या कुटुंबातच नव्हे, तर अनेक ओबीसी नेते आणि मंत्र्यांच्या कुटुंबांमध्ये मराठा समाजातील मुलींचे विवाह झाल्याचा दावा त्यांनी केला.
ओबीसी समाजाच्या प्रश्नांवर राजकीय निर्णय घेताना कोणाच्याही दबावाला बळी पडू नये, अशी भूमिका मांडताना वाघमारे यांनी ओबीसींच्या हक्कांसाठी लढण्याचा निर्धार व्यक्त केला. ओबीसी समाजाच्या प्रश्नांकडे दुर्लक्ष होत असल्यास संबंधित मंत्र्यांना जाब विचारला जाईल, असेही त्यांनी सांगितले.

दरम्यान, वाघमारे यांच्या या वक्तव्याचा व्हिडीओ सोशल मीडियावर व्हायरल झाल्यानंतर मराठा समाजातून तीव्र प्रतिक्रिया उमटू लागल्या आहेत. आरक्षणाच्या प्रश्नावर आधीच दोन्ही समाजांमध्ये मतभेद असताना अशा प्रकारच्या वक्तव्यांमुळे सामाजिक वातावरण अधिक तणावपूर्ण होण्याची भीती व्यक्त केली जात आहे.
आरक्षणासारख्या संवेदनशील विषयावर नेत्यांनी संयमाने आणि जबाबदारीने वक्तव्य करावे, अशी अपेक्षा व्यक्त होत असून, वाघमारे यांच्या वक्तव्यावरून पुढील काळात राजकीय आणि सामाजिक प्रतिक्रिया उमटण्याची शक्यता आहे.