संगीत साधनेत शुद्धता, एकाग्रता व निरपेक्ष भाव जपला छाया गांगुली यांची भावना

पुणे : “लहानपणापासून संगीताची आवड असल्याने संगीत साधनेकडे वळले. आकाशवाणीमध्ये कार्यरत असताना अनेक प्रतिष्ठित कलाकारांचे मार्गदर्शन सहवास लाभला. विविधभारतीवरील आरोही कार्यक्रमात, तर गमन या चित्रपटात पहिल्यांदा गायनाची संधी मिळाली. शुद्ध, एकाग्र व निरपेक्ष भाव संगीत साधना करताना जपला,” अशी भावना ज्येष्ठ गायिका छाया गांगुली यांनी व्यक्त केली.

संगीत नाटक अकादमीचे माजी अध्यक्ष शेखर सेन यांच्या हस्ते छाया गांगुली यांचा एकाहत्तरीनिमित्त सत्कार करण्यात आला. यावेळी गांगुली व सेन यांच्या हस्ते नाद विदूषी गुरु अन्नपूर्णा देवी यांच्या जीवनावरील सुरोपनिषद या पुस्तकाच्या बंगाली आवृत्तीचे प्रकाशन झाले. दीपलक्ष्मी नागरी सहकारी पतसंस्था आणि लोकमंगल ग्रुप शिक्षण संस्थेच्या वतीने आयोजित कार्यक्रमावेळी ज्येष्ठ बासरी वादक नित्यानंद हळदीपूर, लेखक डॉ. सुनील शास्त्री, चित्रपट संगीताचे अभ्यासक स्वप्नील पोरे, संयोजक शिरीष चिटणीस, प्रतीक प्रकाशनाचे प्रवीण जोशी आदी उपस्थित होते.

छाया गांगुली म्हणाल्या, “आकाशवाणी व दूरदर्शनमध्ये जवळपास ३६ वर्षे सेवा केली. या काळात जयदेव, मधुराणी, प्रभा अत्रे, शोभा गुर्टू, आशा, पंचम दा यांसह इतर अनेक मान्यवर कलाकारांना आकाशवाणीच्या कार्यक्रमात सहभागी करून घेता आले. जयदेव यांनी गायनाची संधी दिली. मधुराणी यांनी संगीताची समज वाढवली. संगीत सरिता कार्यक्रमातून अनेक सादरीकरण करता आली. कलेचा सन्मान केला. कलेने मला सन्मान दिला.”