होळी आणि शनिवारी सुट्टीच्या दिवशीही उपनिबंधक कार्यालये सुरू राहणार

पुणे : घर खरेदी करणाऱ्यांना सुटीच्या दिवशी कागदपत्रांची नोंदणी करता यावी, यासाठी अनिल पारखे सह जिल्हानिबंधक व मुद्रांक जिल्हाधिकारी यांनी मार्च महिन्यात सोमवार ते शनिवार या आठवड्यातील सर्व ६ दिवस सर्व उपनिबंधक कार्यालये सुरू ठेवण्याचे आदेश दिले आहेत.

क्रेडाई- पुणे मेट्रोचे अध्यक्ष अनिल फरांदे म्हणाले, “विभागातर्फे दरवर्षी १ एप्रिल रोजी बाजारमूल्य प्रसिद्ध केले जात असल्याने आणि मार्च हा आर्थिक वर्षाचा शेवटचा महिना असल्याने अनेक गृह खरेदीदार या महिन्यात कागदपत्रांची नोंदणी करण्यावर भर देतात. मार्च हा आर्थिक वर्षाचा शेवट असल्याने नोंदणीसाठी मोठी गर्दी होत आहे. आर्थिक वर्ष संपत असल्याने शनिवारी व इतर शासकीय सुटीच्या दिवशी कार्यालये सुरू ठेवल्यास शासनाचा महसूल वाढण्यासही मदत होणार आहे. त्यामुळे लोकांच्या कल्याणासाठी नोंदणी कार्यालये सुरू ठेवण्याचे आवाहन आम्ही प्रशासनाकडे केले होते,” असे त्यांनी सांगितले.