अजितदादा पवार यांचे संगमवाडी येथे भव्य स्मारक उभारण्याची मागणी 

माजी उपमहापौर डॉ. सिद्धार्थ धेंडे आणि राहुल डंबाळे यांचे महापालिका आयुक्तांना निवेदन 

पुणे : महाराष्ट्र राज्याचे माजी उपमुख्यमंत्री तथा ज्येष्ठ नेते कै. अजितदादा पवार यांच्या अपघाती निधनाने संपूर्ण महाराष्ट्रात शोककळा पसरली आहे. राज्याच्या उभारणीत तसेच पुणे शहराच्या विकासात त्यांनी दिलेल्या महत्त्वपूर्ण योगदानाच्या स्मरणार्थ पुणे शहरात त्यांचे भव्य स्मारक उभारावे, अशी मागणी माजी उपमहापौर डॉ. सिद्धार्थ धेंडे आणि रिपब्लिकन सोशालिस्ट पार्टीचे अध्यक्ष राहुल डंबाळे यांनी मुख्यमंत्री  देवेंद्र फडणवीस व  पुणे महानगरपालिकेचे आयुक्त नवल किशोर राम  यांच्याकडे निवेदनाद्वारे  केली आहे.

या निवेदनात म्हटले आहे की, कै. अजितदादा पवार यांचे पुणे शहराशी अत्यंत जिव्हाळ्याचे नाते होते. पुणे शहराच्या उभारणीत त्यांची भूमिका महत्त्वपूर्ण राहिलेली असल्याने नागरिकांच्या भावना लक्षात घेऊन त्यांचे यथोचित स्मारक उभारणे आवश्यक आहे.

संगमवाडी येथे पुणे महानगरपालिकेच्या नदी सुधार प्रकल्पांतर्गत नव्याने उभारण्यात आलेल्या संगमघाटावर कै. अजितदादा पवार यांचा पूर्णाकृती भव्य पुतळा उभारावा तसेच त्यांच्या कार्याचा वारसा जपणारी शिल्पसृष्टी निर्माण करावी, अशी मागणी करण्यात आली आहे. यासाठी चालू अर्थसंकल्पात किमान दहा कोटी रुपयांची प्राथमिक तरतूद करण्यात यावी, असेही निवेदनात नमूद करण्यात आले आहे.

या ठिकाणी उभारण्यात येणारे स्मारक हे पुणे शहरातील नागरिकांसाठी कै. अजितदादा पवार यांच्या आठवणी कायम ठेवणारे महत्त्वपूर्ण केंद्र ठरेल, असा विश्वास डॉ. सिद्धार्थ धेंडे आणि राहुल डंबाळे यांनी व्यक्त केला आहे.