फाउंटनपेन प्रेमी पुणेकरांसाठी ‘द पुणे फाउंटन पेन शो’ ची पर्वणी
२६ सप्टेंबर रोजी सकाळी साडे दहा वाजता मुंबई उच्च न्यायालयाचे निवृत्त न्यायाधीश दिलीप कर्णिक यांच्या हस्ते या प्रदर्शनाचे उद्घाटन होणार आहे. यावेळी भारतीय जनता पक्षाचे पुणे शहर उपाध्यक्ष मनोज खत्री उपस्थित राहणार आहेत. तीन दिवस चालणाऱ्या या प्रदर्शनाची वेळ सकाळी १०.३० ते संध्याकाळी साडेआठ अशी राहणार असून ते सर्वासाठी विनामूल्य असणार आहे.
फाउंटन पेन शो मध्ये १०० रुपयांपासून ते पुढे पेन उपलब्ध असतील. दरवर्षीप्रमाणे यावर्षी देखील हस्ताक्षर स्पर्धेचे आयोजन करण्यात आले आहे. वय वर्षे १० पासून ते जेष्ठ नागरीकांना यामध्ये भाग घेता येईल. सहभाग घेणाऱ्या मंडळींनी घरून शाईच्या पेनाने भारताचे राष्ट्रगीत (जन गण मन) लिहून आणायचे आहे आणि प्रदर्शनात जमा करायचे आहे. स्पर्धेत सहभागी होणाऱ्या व्यक्तींना प्रमाणपत्र देण्यात येणार आहे. या स्पर्धेचा निकाल सात नोव्हेंबर रोजी जागतिक फाउंटन पेन दिनी जाहीर करण्यात येणार आहे.
सुंदर हस्ताक्षर असेल तर व्यक्तीमत्व उत्तम बनते. मुलांमध्ये देखील बौद्धिक क्षमता वाढण्यास मदत होते, विद्यार्थ्यांमध्ये शाईपेनाबाबत जागरूकता वाढावी हाच उद्देश ठेवून गेल्या पाच वर्षांपासून या पेन शोचे आयोजन करण्यात येत आहे. अनेक शाळांनी मुलांना शाईच्या पेन वापरण्याच्या सूचना केल्या आहेत. अलीकडच्या काळात लोकांमध्ये शाईच्या पेनबाबत चांगली जागरूकता येऊ लागली आहे, त्यामुळे अशा प्रकारच्या पेन शोचा त्यांना नक्की फायदा होत असल्याचे रश्मी नगरकर-पिल्ले यांनी स्पष्ट केले.