पहिल्या ‘वेव्हज परिषदे’चा मान महाराष्ट्राला दिल्याबद्दल प्रधानमंत्र्यांचे उपमख्यमंत्री अजित पवार यांनी मानले आभार
पुणे : देशातील पहिली ‘वर्ल्ड ऑडिओ व्हिज्युअल ॲन्ड एंटरटेन्मेंट समिट’ अर्थात ‘वेव्हज परिषद’ आयोजित करण्याची संधी महाराष्ट्राला दिल्याबद्दल प्रधानमंत्री श्री. मोदी यांचे उपमुख्यमंत्री तथा जिल्ह्याचे पालकमंत्री अजित पवार यांनी आभार मानले.
महाराष्ट्र राज्य स्थापनेच्या ६५ व्या वर्धापन दिनानिमित्त पोलीस कवायत मैदान येथे झालेल्या कार्यक्रमात राष्ट्रध्वजाला मानवंदना दिल्यानंतर आपल्या मनोगतात त्यांनी ही भावना व्यक्त केली.
यावेळी आमदार बापुसाहेब पठारे, विभागीय आयुक्त डॉ. चंद्रकांत पुलकुंडवार, पुणे महानगरपालिका आयुक्त डॉ. राजेंद्र भोसले, जमाबंदी आयुक्त व संचालक भूमी अभिलेख डॉ. सुहास दिवसे, पुणे पोलीस आयुक्त अमितेश कुमार, पिंपरी चिंचवड पोलीस आयुक्त विनय कुमार चौबे, शिक्षण आयुक्त सचिंद्र प्रताप सिंह, क्रीडा व युवक सेवा आयुक्त सुरज मांढरे, साखर आयुक्त सिद्धाराम सालीमठ, महामेट्रोचे व्यवस्थापकीय संचालक श्रावण हर्डीकर, ‘पीएआरडीए’चे मुख्य कार्यकारी अधिकारी योगेश म्हसे, जिल्हाधिकारी जितेंद्र डुडी, पोलीस अधीक्षक पंकज देशमुख, जिल्हा परिषदेचे मुख्य कार्यकारी अधिकारी गजानन पाटील, स्वातंत्र्यसैनिक यांच्यासह वरिष्ठ प्रशासकीय अधिकारी, विविध विभागांचे वरिष्ठ अधिकारी-कर्मचारी, ज्येष्ठ नागरिक, विद्यार्थी आणि नागरिक उपस्थित होते.
पवार म्हणाले, यंदाचा महाराष्ट्र दिन आपल्या सर्वांसाठी अत्यंत महत्त्वाचा आहे. आज आपल्या महाराष्ट्राच्या राजधानीत, देशाच्या आर्थिक राजधानीत, महानगरी मुंबई येथे देशाचे प्रधानमंत्री नरेंद्र मोदी यांच्या हस्ते ‘वेव्हज परिषदे’चे उद्घाटन हस्ते होणार असून याचा समस्त महाराष्ट्रवासीयांना मनापासून आनंद आहे, असेही श्री. पवार म्हणाले.