पंतप्रधान नरेंद्र मोदी यांनी सशस्त्र दलाच्या जवानांसोबत साजरी केली दिवाळी

 

नवी दिल्‍ली- पंतप्रधान नरेंद्र मोदी यांनी आज गुजरातमधील कच्छच्या खाडी क्षेत्रातल्या लक्की नाला इथे सीमा सुरक्षा दल, लष्कर, नौदल आणि हवाई दलाच्या शूर जवानांसोबत दिवाळीचा सण साजरा केला. अत्यंत दुर्गम ठिकाणी धैर्याने तैनात राहून आपले रक्षण करणाऱ्या आपल्या सुरक्षा जवानांचा अभिमान वाटत असल्याचे पंतप्रधान नरेंद्र मोदी यावेळी म्हणाले. कच्छमधील खाडी क्षेत्रातले तापमान अत्यंत तीव्र असते, त्यामुळेच हा भाग आव्हानात्मक आणि दुर्गमही आहे. अशातच इथे पर्यावरण विषयक इतरही आव्हानांचा सामना करावा लागत असल्याचेही पंतप्रधानांनी यावेळी नमूद केले.

यावेळी पंतप्रधान नरेंद्र मोदी यांनी या खाडी क्षेत्रातील एका तरंगत्या सीमा चौकीलाही (Floating Border Outposts – BOPs) प्रत्यक्ष भेट दिली आणि तिथल्या शूर सुरक्षा जवानांना मिठाईचे वाटप केले.

याबाबतच्या आपल्या अनुभवाबद्दल पंतप्रधान नरेंद्र मोदी यांनी एक्स या समाज माध्यमावर लिहिलेले संदेश :

गुजरातमधील कच्छमध्ये आपल्या शूर जवानांसोबत दिवाळी साजरी करत आहे. आपले सुरक्षा जवान अत्यंत दुर्गम ठिकाणी धैर्याने तैनात राहून आपले रक्षण करतात, आम्हाला त्यांचा प्रचंड अभिमान वाटतो.

कच्छच्या खाडी क्षेत्रातल्या लक्की नाला इथे आपल्या सीमा सुरक्षा दल, लष्कर, नौदल आणि हवाई दलाच्या शूर जवानांसोबत दिवाळीचा सण साजरा करताना खूपच आनंद झाला. हा भाग अत्यंत आव्हानात्मक आणि दुर्गमही आहे. इथे दिवस कडक उष्णतेचा असतो आणि प्रचंड

गारठाही असतो. या खाडीच्या प्रदेशात  पर्यावरण विषयक इतरही आव्हानांचा सामना करावा लागतो. या खाडी क्षेत्रातील एका तरंगत्या सीमा चौकीलाही प्रत्यक्ष भेट दिली आणि तिथल्या शूर सुरक्षा जवानांना मिठाईचे वाटप केले.