निषाद बाक्रे व विदुषी मंजिरी असनारे-केळकर यांच्या गायनाने रंगली ‘संगीत संध्या’

सुप्रसिद्ध तबलावादक तालयोगी पद्मश्री सुरेश तळवलकर, माजी आमदार उल्हास पवार, डॉ विकास कशाळकर, मीरा पणशीकर आणि मीरा फातर्पेकर आदी मान्यवर या वेळी उपस्थित होते.

निषाद बाक्रे यांनी राग मुलतानीने आपल्या गायनाला सुरुवात केली. यामध्ये त्यांनी ‘कवन देस गयी…’ ही विलंबित झुमरा तालातील बंदिश, द्रुत तीन तालातील ‘मोरे मंदिरवा…’ हा ख्याल सादर केला. यानंतर त्यांनी राग नट कामोद सादर केला. यामध्ये त्यांनी ‘नेवर बाजो रे …’ ही विलंबित तीनतालातील बंदिश आणि ‘साची काहो तुम प्यारे…’ हा ख्याल गायला. त्यांना भरत कामत (तबला), सुयोग कुंडलकर (संवादिनी) आणि श्रीरंग दातार, चिन्मय लेले (तानपुरा) अशी साथसंगत होती.

यानंतर मंजिरी असनारे- केळकर यांनी राग मारुबिहाग गायला. यामध्ये त्यांनी ‘रसिया हो ना जा…’ ही विलंबित तीन तालातील रचना प्रस्तुत केली. राग परजमध्ये ‘अखियां मोरी…’ या झपतालातील बंदिशीने त्यांनी कार्यक्रमाचा समारोप केला. त्यांना भरत कामत (तबला), सुयोग कुंडलकर (संवादिनी) आणि देवश्री नवघारे (तानपुरा) यांनी साथसंगत केली. आनंद देशमुख यांनी संपूर्ण कार्यक्रमाचे सूत्रसंचालन केले.