सीओईपी तंत्रज्ञान विद्यापीठ, पुणे’च्या नियामक मंडळाच्या अध्यक्षपदी डॉ. प्रमोद चौधरी यांची नियुक्ती
डॉ. चौधरी यांनी विविध सामाजिक, शैक्षणिक व औद्योगिक संस्थांची महत्वाची पदे भूषवली आहेत. ज्यामध्ये प्रामुख्याने मराठा चेंबर ऑफ कॉमर्स, इंडस्ट्रीज अँड अॅग्रीकल्चरचे अध्यक्ष, पुणे इंटर नॅशनल सेंटरचे संस्थापक सदस्य, पुण्यातील सायन्स अँड टेक्नोलॉजी पार्कचे अध्यक्ष, वर्ल्ड बायो इकॉनॉमी फोरमच्या सल्लागार समितीचे सदस्य, सावित्रीबाई फुले पुणे विद्यापीठाच्या सल्लागार समितीचे अध्यक्ष आदींचा समावेश आहे.
जैवइंधन क्षेत्रात डॉ चौधरी यांनी केलेल्या उल्लेखनीय कामगिरीची दखल राष्ट्रीय आणि आंतरराष्ट्रीय पातळीवर घेण्यात आली असून त्यांना विविध पुरस्काराने सन्मानित करण्यात आले आहे. यामध्ये प्रामुख्याने जॉर्ज वॉशिंग्टन कार्व्हर पुरस्कार (हा पुरस्कार मिळवणारे पहिले भारतीय), इंजिनिअरींग कौन्सिल ऑफ इंडियातर्फे देण्यात येणारा मानाचा एमिनंट इंजिनिअर पुरस्कार, जागतिक मराठी अकादमीचा जागतिक मराठी भूषण पुरस्कार, सावित्रीबाई फुले पुणे विद्यापीठाचा जीवन साधना गौरव पुरस्कार या सारख्या अनेक पुरस्कारांचा समावेश आहे.
या नियुक्तीवर प्रतिक्रिया देताना डॉ. प्रमोद चौधरी म्हणाले, “राज्य सरकारने सीओईपी सारख्या प्रतिष्ठित संस्थेची एक मोठी जवाबदारी माझ्यावर सोपवली याचा आनंद होत आहे. संस्थेच्या लौकिकात भर टाकणारी कामगिरी करून संस्थेचे मानांकन उंचावण्यासाठी मी व माझे सहकारी पूर्ण प्रयत्न करू. तसेच उद्योगांच्या आजघडीच्या व भविष्यातील गरजा लक्षात घेत त्यासाठी आवश्यक ज्ञान आणि कौशल्ये असणारे अभियंते निर्माण करून अभियांत्रिकी क्षेत्रात भारताला जागतिक पातळीवर आघाडीचं स्थान प्राप्त करायचे उद्दिष्ट डोळ्यासमोर ठेवून काम करू. त्यासाठी नियोजनबद्ध पद्धतीने पाऊले उचलून कालबद्ध आरखडा तयार करण्याचे काम प्राधान्याने हाती घेऊ.”