शनिवारवाडा येथे जलकलश, मूर्ती व तलवार पूजनाने श्रीमंत नानासाहेब पेशवे जन्म त्रिशताब्दी सोहळ्याला प्रारंभ

मोहन शेटे म्हणाले, श्रीमंत बाजीराव पेशवे आणि काशीबाई यांचे सुपुत्र श्रीमंत नानासाहेब यांचा जन्म ६ डिसेंबर १७२१ रोजी वडगाव मावळ येथील साते गावी झाला. श्रीमंत थोरले नानासाहेब पेशवे हे मराठ्यांच्या इतिहासातील अत्यंत महत्त्वाचे व्यक्तिमत्व होते. इसवी सन १७४० ते १७६१ असे २१ वर्ष त्यांनी हिंदवी साम्राज्याचे पंतप्रधान म्हणून कार्य केले. यंदाचे त्यांचे त्रिजन्मशताब्दी वर्ष असून त्यानिमित्त त्यांच्या जन्मगावी मुख्य सोहळ्यांतर्गत नानासाहेब पेशवे गौरव ग्रंथाचे प्रकाशन होणार असून ३०० युवक समूह गायनाने आदरांजली अर्पण करणार आहेत. हा कार्यक्रम रविवार, दि. ५ डिसेंबर २०२१ रोजी दुपारी ४ वाजता जुन्या पुणे-मुंबई रस्त्यावरील वडगाव मावळ जवळ साते या गावात होणार आहे.