कायदे असूनही अंमलबजावणीचा अभाव हीच मोठी शोकांतिका; अन्नभेसळीवरील कारवाईचे तुकाराम मुंढेंकडून समर्थन

मुंबई : महाराष्ट्रात अन्न व औषध प्रशासनाकडून (FDA) अन्न व्यवसाय आणि भेसळखोरांविरोधात सुरू असलेल्या कारवाईचे माजी अधिकारी तुकाराम मुंढे यांनी ठाम समर्थन केले आहे. अन्न सुरक्षेसाठी देशात कठोर कायदे आणि नियम पूर्वीपासूनच अस्तित्वात आहेत; मात्र त्यांची प्रभावी अंमलबजावणी झाली नाही, हीच मोठी समस्या असल्याचे त्यांनी स्पष्ट केले.

गांधीनगर येथे आयोजित एका कार्यक्रमात बोलताना मुंढे यांनी सांगितले की, अन्न सुरक्षेच्या नावाखाली कोणत्याही व्यापाऱ्याला किंवा हॉटेल व्यावसायिकाला लक्ष्य करण्याचा प्रशासनाचा उद्देश नसतो. नागरिकांचे आरोग्य सुरक्षित ठेवणे आणि कायद्याचे पालन सुनिश्चित करणे, हा या कारवाईमागील मुख्य उद्देश आहे.
अन्नपदार्थांच्या गुणवत्तेकडे दुर्लक्ष केल्यास त्याचा थेट परिणाम नागरिकांच्या आरोग्यावर होतो. भेसळयुक्त किंवा निकृष्ट दर्जाचे अन्न सातत्याने सेवन केल्याने निर्माण होणाऱ्या आरोग्याच्या समस्यांकडे गांभीर्याने पाहण्याची गरज असल्याचे मुंढे यांनी नमूद केले.

देशातील आजारांचे स्वरूपही मोठ्या प्रमाणात बदलले आहे. मधुमेह, उच्च रक्तदाब आणि हृदयविकारासारख्या बिगर-संसर्गजन्य आजारांचे प्रमाण वेगाने वाढत आहे. या आजारांचा आपल्या दैनंदिन आहाराशी जवळचा संबंध असून, आपण दररोज काय खातो आणि काय पितो याचा आरोग्यावर होणारा परिणाम समजून घेणे आवश्यक आहे, असे त्यांनी सांगितले.
स्वातंत्र्याच्या काळात देशात संसर्गजन्य आजारांचे प्रमाण मोठे होते. मात्र कालांतराने बिगर-संसर्गजन्य आजारांचे प्रमाण वाढले आहे. आज अनेक नागरिक विविध आजारांवर उपचार घेत असले, तरी त्या आजारांचा त्यांच्या आहाराशी असलेला संबंध अनेकदा दुर्लक्षित केला जातो, असेही मुंढे यांनी अधोरेखित केले.

त्यामुळे अन्न सुरक्षेचे नियम केवळ कागदावर न राहता त्यांची कठोर आणि सातत्यपूर्ण अंमलबजावणी होणे आवश्यक आहे. नागरिकांच्या आरोग्याच्या दृष्टीने अन्नाची गुणवत्ता आणि सुरक्षितता यांना सर्वोच्च प्राधान्य देण्याची गरज असल्याचे मुंढे यांनी स्पष्ट केले.