देशाच्या इतिहासात डोभाल यांची सुवर्णाक्षरात होईल नोंद: अमित शहा

लोकमान्य टिळक राष्ट्रीय पुरस्काराने अजित डोभाल यांचा गौरव
पुणे, १ ऑगस्ट : लोकमान्य बाळ गंगाधर टिळक यांच्या १०६व्या पुण्यतिथीनिमित्त पुण्यात आयोजित भव्य समारंभात केंद्रीय गृहमंत्री अमित शहा यांच्या हस्ते राष्ट्रीय सुरक्षा सल्लागार (एनएसए) अजित डोभाल यांना लोकमान्य टिळक राष्ट्रीय पुरस्कार २०२६ प्रदान करण्यात आला. देशाच्या अंतर्गत व बाह्य सुरक्षेला बळकटी देण्यासाठी, गुप्तचर व्यवस्थेचे सक्षमीकरण करण्यासाठी आणि राष्ट्रीय हिताच्या धोरणात्मक निर्णयांमध्ये दिलेल्या उल्लेखनीय योगदानाबद्दल टिळक स्मारक ट्रस्टने डोभाल यांची यंदाच्या पुरस्कारासाठी निवड केली.
पुरस्कार वितरणानंतर बोलताना अमित शहा यांनी लोकमान्य टिळक यांच्या राष्ट्रनिष्ठ, निर्भय आणि स्वाभिमानी विचारांचा उल्लेख केला. त्यांनी सांगितले की, अजित डोभाल यांनीही त्याच ध्येयाने देशाच्या सुरक्षेसाठी आयुष्य समर्पित केले आहे. पंतप्रधान नरेंद्र मोदी यांच्या कार्यकाळात राष्ट्रीय सुरक्षा आणि परराष्ट्र धोरणाशी संबंधित अनेक महत्त्वाच्या निर्णयांमध्ये डोभाल यांनी मोलाचे मार्गदर्शन केले असून, भारताची सुरक्षा व्यवस्था अधिक सक्षम करण्यामध्ये त्यांचे मोठे योगदान असल्याचे शहा यांनी नमूद केले. तसेच देशाच्या सुरक्षा इतिहासात त्यांचे कार्य कायम स्मरणात राहील, असे गौरवोद्गारही त्यांनी काढले.
पुरस्कार स्वीकारताना अजित डोभाल यांनी हा सन्मान अत्यंत नम्रतेने स्वीकारत, तो देशाच्या संरक्षणासाठी दिवस-रात्र कार्य करणाऱ्या सुरक्षा दलांना, गुप्तचर यंत्रणांना आणि आपल्या सहकाऱ्यांना समर्पित असल्याची भावना व्यक्त केली. लोकमान्य टिळक यांच्या नावाने दिला जाणारा हा पुरस्कार मिळणे हा आपल्या आयुष्यातील मोठा सन्मान असल्याचे त्यांनी सांगितले. भारत आजही लोकमान्य टिळक यांच्या राष्ट्रभक्ती, स्वावलंबन आणि राष्ट्रीय एकात्मतेच्या विचारांवर पुढे वाटचाल करत असल्याचेही त्यांनी अधोरेखित केले.
या कार्यक्रमाला मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, लोकप्रतिनिधी, वरिष्ठ अधिकारी, संरक्षण क्षेत्रातील मान्यवर आणि विविध क्षेत्रातील प्रतिष्ठित नागरिक मोठ्या संख्येने उपस्थित होते. केंद्रीय गृहमंत्री अमित शहा यांच्या दौऱ्याच्या पार्श्वभूमीवर पुणे शहरात कडेकोट सुरक्षा व्यवस्था तैनात करण्यात आली होती.