हिंडाल्कोकडून चाकण येथील नवीन अत्याधुनिक सुविधेतून महिंद्रला १०,००० अॅल्युमिनियम बॅटरी एन्क्लोजरचा पुरवठा

 

पुणे — आदित्य बिर्ला समूहाची धातू उत्पादनांतील प्रमुख कंपनी आणि जगातील सर्वात मोठ्या अॅल्युमिनियम कंपन्यांपैकी एक असलेल्या हिंडाल्को इंडस्ट्रीज लिमिटेडने आज प्रमुख वाहन निर्मात्या महिंद्राच्या अत्याधुनिक ई-एसयूव्हीएस – बीई ६ आणि एक्सईव्ही ९ई या वाहनांसाठी १०,००० अॅल्युमिनियम बॅटरी एन्क्लोजरच्या पुरवठ्याची यशस्वीरित्या पूर्तता केल्याची घोषणा केली. कंपनीने भारतातील प्रमुख वाहन उत्पादन केंद्र असलेल्या पुणे येथील चाकण येथे त्यांच्या अत्याधुनिक समर्पित ईव्ही घटक उत्पादन सुविधेचे या निमित्ताने अनावरण केले. भारताच्या स्वच्छ गतिशीलतेच्या ध्यासाच्या प्रवासातील हा एक महत्त्वपूर्ण टप्पा आणि प्रगतीपर पाऊल आहे. दोन्ही कंपन्या भारताच्या वाहन क्षेत्राच्या विद्युतीकरणाला गती देण्यासाठी या निमित्ताने एकत्र आल्या आहेत.

सुमारे ₹५०० कोटींच्या भांडवली गुंतवणुकीतून बांधलेली आणि औद्योगिक उद्यानात ५ एकर जागेवर पसरलेली ही सुविधा, हिंडाल्कोच्या ईव्ही घटक उत्पादनात प्रवेशाचे प्रतिनिधित्व करते. देशातील हलक्या वजनाच्या, क्रॅश-प्रतिरोधक बॅटरी एन्क्लोजर उपाययोजनांच्या वाढत्या मागणीची पूर्तता करण्यासाठी ही नवीन सुविधा स्थापित करण्यात आली आहे. कंपनीच्या नाविन्यपूर्ण आणि शाश्वत गतिशीलतेसाठीच्या वचनबद्धतेला ही सुविधा बळकटी देते. सध्या दरवर्षी ८०,००० एन्क्लोजर तयार करण्याची तिची क्षमता असून, त्यात १६०,००० युनिट्सपर्यंत वाढ करण्याची कंपनीची योजना आहे. आजपर्यंत ही अॅल्युमिनियम बॅटरी पॅक वापरणारी ३,००० हून अधिक महिंद्रा ईव्ही आधीच भारतीय रस्त्यांवर धावत आहेत.

या घडामोडीविषयी बोलताना, हिंडाल्को इंडस्ट्रीज लिमिटेडचे व्यवस्थापकीय संचालक श्री. सतीश पै म्हणाले, “आमची चाकण सुविधा भारताच्या ईव्ही परिसंस्थेमध्ये आयात अवलंबित्वापासून उच्च-कार्यक्षमता असलेल्या, स्थानिकीकृत अॅल्युमिनियम उपाययोजनेकडे एक धोरणात्मक संक्रमण निश्चितच दर्शविते. या प्रवासात महिंद्रशी भागीदारी करण्याचा आम्हाला अभिमान आहे, जो केवळ गतिशीलता संक्रमणासाठी आमची वचनबद्धता दर्शवत नाही तर भारतातील गतिशीलतेच्या विद्युतीकरणाला चालना देण्यामध्ये महिंद्रच्या नेतृत्वस्थानाला देखील अधोरेखित करतो. आमच्या अभियांत्रिकी सामर्थ्य आणि शाश्वततेवर लक्ष केंद्रित करून, आम्ही पुढील पिढीतील ऑटोमोटिव्ह सोल्यूशन्सची सह-निर्मिती करण्यासाठी आज सर्वोत्तम स्थितीत आहोत.”

महिंद्र अँड महिंद्रचे कार्यकारी संचालक आणि ऑटो आणि फार्म विभागाचे मुख्य कार्यकारी अधिकारी श्री. राजेश जेजुरीकर म्हणाले, “ईव्ही निर्मितीच्या या प्रवासामध्ये हिंडाल्कोसोबत भागीदारी करण्यास महिंद्र उत्सुक आहे. नवीन उपाययोजना देण्यासाठी आवश्यक सामग्री विकसित करण्यात त्यांची तज्ज्ञता आणि मजबूत अभियांत्रिकी क्षमतांनी कार्यक्षम आणि शाश्वत बॅटरी एन्क्लोजर उपायांना विकसित करण्यात महत्त्वाची भूमिका बजावली आहे. आम्हाला विश्वास आहे की हे मोबिलिटीच्या भविष्याला आकार देण्यास, या क्षेत्रातील विद्युतीकरणाला गती देणारे अत्याधुनिक उपाय प्रदान करण्यात एक परिवर्तनकारी भूमिका बजावेल.”

महिंद्रच्या बरोबरीने सह-विकसित केलेले बॅटरी एन्क्लोजर हे पारंपारिक स्टील डिझाइनपेक्षा ४० टक्क्यांपर्यंत वजन कमी करते, ज्यामुळे वाहनाच्या चालन श्रेणीत ८-१० टक्के सुधारणा, क्रॅश सेफ्टी वाढवणे आणि बॅटरी कूलिंगसाठी लक्षणीयरीत्या सुधारित तापमान व्यवस्थापन शक्य बनविते. याव्यतिरिक्त, हे एन्क्लोजर कमी-कार्बन अॅल्युमिनियम देखील वापरतात, जे हिंडाल्कोच्या शाश्वतता आणि नाविन्यपूर्णतेसाठी वचनबद्धतेवर भर देणारे आहे.

चाकण सुविधेमुळे १,००० पर्यंत नोकऱ्या निर्माण होण्याची अपेक्षा आहे आणि आयातीवरील अवलंबित्व कमी करण्याच्या सरकारच्या ‘मेक इन इंडिया’ दृष्टिकोनाशी ते पूर्णपणे जुळणारे देखील आहे. या सुविधेचे आणखी एक प्रमुख वैशिष्ट्य म्हणजे त्यात कार्यरत लिंग-विविध कर्मचारी वर्ग, ज्यामध्ये जवळजवळ १०० टक्के महिला मशीन ऑपरेटर्सचा अंतर्भाव केला गेला आहे. जी सध्याच्या उत्पादन क्षेत्रातील दुर्मिळ गोष्ट असून, हिंडाल्कोच्या समावेशकतेसाठी दृढ वचनबद्धतेलाच ती प्रदर्शित करते.

या टप्प्यासह, हिंडाल्को इतर भारतीय आणि जागतिक ओईएम निर्मात्यांसाठी याच धर्तीची क्षमता वाढवण्याची योजना आखत आहे, ईव्ही आणि अंतर्गत ज्वलन इंजिन (आयसीई) वाहनांसाठी स्ट्रक्चरल आणि क्रॅश-संबंधित भाग समाविष्ट करण्यासाठी त्यांच्या अॅल्युमिनियम धातूचा वापर असलेल्या प्रस्तुतींचा विस्तार केला जात आहे.

भारतातील ईव्ही मूल्य साखळी परिपक्व होत असताना, गिगा-फॅक्टरीज आणि स्थानिक सेल उत्पादनाच्या जलद वाढीमुळे बॅटरी-ग्रेड अॅल्युमिनियम आणि संबंधित घटकांची मागणी वाढण्याची अपेक्षा आहे. भविष्य-केंद्रित क्षमतांमध्ये हिंडाल्कोची गुंतवणूक ही या वळणावर अग्रस्थानी राहण्यासाठी एक धोरणात्मक पाऊल आहे.