सतारीच्या झंकाराने नादमुद्रा महोत्सवाच्या दुसऱ्या दिवसाला सुरुवात
विदुषी डॉ अश्विनी भिडे देशपांडे यांच्या भावपूर्ण गायनाने महोत्सवाच्या दुसऱ्या दिवशी रसिक भारावले
पुणे : अभिजात भारतीय संगीताचा प्रचार, प्रसार व्हावा, रसिक श्रोत्यांना एकाहून एक सरस कलाकारांची कला अनुभविता यावी, या उद्देशाने अल्फा इव्हेंटस् च्या वतीने आणि बेलवलकर हाऊसिंग यांच्या सहकार्याने आयोजित नादमुद्रा महोत्सवाचा दुसरा दिवस आज संपन्न झाला.
कर्वेनगर येथील डी पी रस्त्यावरील केशवबाग येथे हा तीन दिवसीय सांगीतिक महोत्सव सुरु असून महोत्सव रसिकांसाठी विनामूल्य खुला आहे. कार्यक्रमाचे आयोजक निखिल जोशी, सुप्रसिद्ध गायिका अपर्णा पणशीकर, विदुषी मीरा पणशीकर, संपदा बेलवलकर आदी मान्यवर यावेळी उपस्थित होते. पंडित विजय कोपरकर, पंडित रघुनंदन पणशीकर यांनी देखील आज महोत्सवाला हजेरी लावली.
भेंडी बझार घराण्यातील तरुण सतारवादक, उस्ताद मोहसीन अली खान यांचे सुपुत्र व शिष्य असलेल्या मेहताब अली नियाझी यांच्या सतारवादनाने महोत्सवाच्या दुसऱ्या दिवसाला सुरुवात झाली.
यावेळी बोलताना मेहताब अली नियाझी म्हणाले, “व्यक्तिशः पुणे शहराला कायमच माझ्या मनात एक विशेष जागा राहिली आहे. पुणे शहराचे भेंडी बाजार घराण्याशी खास नाते आहे असे मी मानतो. येथे आल्यावर आमच्या घराण्याचे संस्थापक असलेले उस्ताद अमन अली खान यांची कायमच आठवण येते.”
मेहताब अली नियाझी यांनी राग झिंझोटी सादर करीत आपल्या वादनाचा सुरुवात केली. उस्ताद विलायत खान यांच्या गायकी अंगाचे दर्शन यानिमित्ताने उपस्थित रसिक प्रेक्षकांना झाले. यावेळी मेहताब यांनी आलाप, विलंबित रूपक ताल, मध्यलय झपतालातील बंदिश, मध्यलय व द्रुतलय तीनताल यांचे प्रभावी सादरीकरण केले. आपल्या घराण्याचा पारंपरिक मेरूखंड प्रस्तुत करीत त्यांनी रसिकांची मने जिंकली. उस्ताद रईस खान यांची ‘अनार -अनार’ ही अफगाणी धून सादर करीत त्यांनी आपल्या वादनाचा समारोप केला. मेहताब यांना रामदास पळसुले व गणेश तानवडे यांनी समर्पक तबलासाथ केली.