Wednesday, November 18, 2026
Latest NewsPUNE

अनेकविध कार्यक्रमांनी सेवासदन दिलासा कार्यशाळेत साजरा झाला दिव्यांग सप्ताह

पुणे : जागतिक दिव्यांग सप्ताह अर्थात १ ते ७ डिसेंबर दरम्यान पुण्यातील सेवासदन दिलासा कार्यशाळेत अनेकविध कार्यक्रमांचे आयोजन करीत संपूर्ण सप्ताह साजरा करण्यात आला. नाट्य संस्कार कला अकादमीचे  विश्वस्त प्रकाश पारखी आणि त्यांचे सहकारी यांनी कार्यशाळेतल्या विद्यार्थ्यांसाठी नाट्यछटांचे सर्वसामान्य मुलांच्याकडून सादरीकरण केले. यानंतर विविध माध्यमातून निस्पृहपणे संस्थेला मदत करणाऱ्या सेवाभावी व्यक्तींचा आणि दिलासा कार्यशाळेच्या संपूर्ण स्टाफचा टी सिस्टीम कंपनीचे संचालक प्रसाद सरदेशपांडे व वरिष्ठ सेवा वितरण व्यवस्थापक अमृत पिंपरकर यांच्या हस्ते सत्कार करण्यात आला. यावेळी सेवासदन दिलासा केंद्रच्या  मुलांनी आपले प्रथम पुरस्कार विजेते नाटक ‘अफजलखानाचा वध’ सादर केले तर कार्यशाळेतील मुलांचे नृत्य सादरीकरण झाले.

संपूर्ण सप्ताहात कार्यशाळेमध्ये विद्यार्थ्यांच्या लगोरी फोडणे, बादलीत बॉल टाकणे, गोष्ट सांगणे, गाणं म्हणणे, कॅरम खेळणे, पझल लावणे, पाककलेची कृती सांगणे, एखाद्या शब्दावरून माहिती सांगणे अशा विविध स्पर्धा घेण्यात आल्या. ५ डिसेंबर रोजी कार्यशाळेमध्ये रोटरी क्लब ऑफ पुणे मिडटाउन यांच्याकडून विद्यार्थ्यांना भेट स्वरूपात साहित्य प्रदान करण्यात आले. यावेळी रोटरी क्लब ऑफ पुणे मिडटाउनच्या पदाधिकाऱ्याचा सत्कार करण्यात आला. ६ डिसेंबर रोजी कार्यशाळेमध्ये भारतरत्न डॉक्टर बाबासाहेब आंबेडकर यांच्या महापरिनिर्वाण दिनानिमित्त त्यांच्या प्रतिमेस अभिवादन करण्यात आले. यानंतर सुरेंद्र माजगावकर यांनी मॅजिक शो सादर केला.

सप्ताहाचा समारोप बाळकृष्ण नेहरकर यांच्या फन फेअर गेम्स आणि ऑर्केस्ट्राच्या मेळाव्याने झाला. यामध्ये दिवसभर गेम्स, मजा, स्नेहभोजन आणि बक्षीस वितरण समारंभाचे आयोजन करण्यात आले होते. संपूर्ण सप्ताहाचा विद्यार्थी आणि पालकांनी आनंद घेतला.

Leave a Reply