जागतिक कीर्तीचे अभियंते, प्रख्यात उद्योगपती सुधाकर प्रभू यांचे निधन 

 

 पुणे : प्रख्यात उद्योगपती सुधाकर श्रीरंग प्रभू (वय 87) यांचे लंडन मुक्कामी नुकतेच निधन झाले. त्यांच्या मागे पत्नी, लेखिका डॉ. मीना प्रभू, चिरंजीव तुषार, आशू, कन्या वर्षा काळे व नातवंडे असा परिवार आहे.  

 सुधाकर प्रभू हे मूळचे कोकणातले. श्रीरंग रघुनाथ प्रभू, खानोली यांचे ते चिरंजीव. भारतात व्हीजेआयटीतून त्यांनी स्ट्रक्चरल इंजिनिअरिंगची पदवी संपादन केली. त्यानंतर लंडनमधील प्रसिद्ध ‘इंपेरिअल कॉलेज’मधून त्यांनी यातील उच्च पदवी प्राप्त केली. इंग्लंडमधील ‘पेल फ्रिशमन’ तसेच भारतातील ‘फ्रिशमन प्रभू’ या कंपन्यांचे ते भागीदार होते.  

 जगातील विविध प्रसिद्ध प्रकल्पांची उभारणी  

 जगातील विविध देशांमध्ये प्रभू यांनी मोठमोठे प्रकल्प उभारले. भव्य इमारती, मेट्रो आणि महामार्गांचे काम त्यांनी केले व आपल्या कामाचा ठसा उमटविला. इग्लंडमधील हॉटेल मेट्रोपोल, ड्रेपर्स गार्डनची इमारतही त्यांनीच साकारली. ड्रेपर्स गार्डनचा बेस समोर ठेऊनच त्यांनी ‘बॉम्बे स्टॉक एक्स्चेंज’ची इमारत उभारली.  

 ‘सेंटर पॉईंट’, ‘टॉवर 42’चे निर्माण  

 सेंटर पॉईंट, या लंडनमधील इमारतीचे कामही त्यांनीच केले. या इमारतीच्या उभारणीबद्दल ‘इन्स्टिटय़ूट स्ट्रक्चरल इंजिनिअर्स’ या संस्थेकडून त्यांचा मानाच्या ‘ऑस्कर फेबर मेडल’ने गौरव करण्यात आला होता. याशिवाय युरोपातील सर्वांत उंच इमारत म्हणून गणल्या गेलेल्या ‘नॅशनल वेस्टमिनस्टर बँक टॉवर’ अर्थात टॉवर 42 या इमारतीचे निर्माणही त्यांच्या प्रतिभेतून झाले.  

 एक्स्प्रेस हाय वे, स्टॉक एक्स्चेंज, पणजी मार्केट साकारले  

 मुंबई-पुणे द्रुतगती महामार्गा, दिल्ली मेट्रो या ठिकाणीही त्यांच्या फर्मची कन्सल्टंसी होती. नागपूरचा पहिला उड्डाणपूलही त्यांनी साकारला. केंद्रीय मंत्री नितीन गडकरी यांच्याशी त्यांचे घनिष्ठ संबंध होते. बॉम्बे स्टॉक एक्स्चेंजसोबतच मुंबई5 हाय ऑईल फिल्ड, पणजी मार्केट, अशा कितीतरी प्रकल्पांना त्यांनी आकार दिला. वानखेडे स्टेडियम, तसेच बालेवाडी क्रीडा संकुलाचा प्रकल्प त्यांनी त्यांचे कनिष्ठ बंधू व प्रसिद्ध आर्किटेक्ट शशी प्रभू यांच्या समवेत पूर्णत्वास नेला.  

 राणी एलिझाबेथच्या हस्ते सन्मान  

 सुधाकर प्रभू यांचे वडील श्रीरंग रघुनाथ प्रभू हे कुडाळ-देशकर आद्य गौड समाजाचे एक प्रमुख सामाजिक कार्यकर्ते होते. प्रामुख्याने मुंबई व डोंबिवलीत त्यांनी सामाजिक काम केले. सुधाकर प्रभू यांनी त्यांचा हा वारसा पुढे नेत उत्स्फूर्तपणे अनेक संस्थांना देणग्या दिल्या. इंग्लंडमधील महाराष्ट्र मंडळासह अनेक संस्थांना त्यांनी सढळ हस्ते आर्थिक मदत केली. ब्रिटनमधून परदेशात निर्यात करण्याच्या योगदानासाठी दिला जाणारा प्रतिष्ठेचा पुरस्कारही त्यांना ब्रिटनच्या महाराणी एलिझाबेथ यांच्या हस्ते देण्यात आला होता. अमेरिकेत वास्तव्यास असलेले कमलाकर खानोलकर हे त्यांचे ज्येष्ठ बंधू, तर मुदुला सरनाईक या त्यांच्या धाकटय़ा भगिनी आहेत.