२४ व्या कलाश्री महोत्सवात शर्वरी जमेनीस यांचा नृत्याविष्कार

पुणे  : नृत्यांगना शर्वरी जमेनीस यांच्या वैविध्यपूर्ण नृत्याविष्काराने रसिकांची मने जिंकली. निमित्त होते कलाश्री महोत्सवाचे. ‘कलाश्री संगीत मंडळा’तर्फे आयोजित ‘२४ व्या कलाश्री संगीत महोत्सवा’ला शुक्रवारी सुरुवात झाली. नवी सांगवी येथील निळू फुले सभागृह येथे होत असलेला यंदाचा महोत्सव भारतरत्न पं. भीमसेन जोशी यांना जन्मशताब्दी वर्षानिमित्त समर्पित करण्यात आला आहे.

कार्यक्रमाचे उद्घाटन आमदार लक्ष्मण जगताप यांच्या हस्ते दिपप्रज्वलनाने करण्यात आले तर कार्यक्रमाच्या अध्यक्षा म्हणून पिंपरी-चिंचवड शहराच्या महापौर उषा ढोरे उपस्थित होत्या. मनोहर ढोरे, धनंजय ढोरे, प्रणाली विचारे, शशी सुधांशु आदि यावेळी उपस्थित होते. कार्यक्रमाच्या सुरुवातीला कलाश्री व राधानंद संगीत विद्यालयाच्या विद्यार्थ्यांनी सादरीकरण केले.

महोत्सवाची सुरुवात किराणा घराण्याचे गायक पं. सुधाकर चव्हाण यांच्या गायनाने झाली. राग ‘पुरिया कल्याण’ने त्यांनी सादरीकरणाला सुरुवात केली. त्यानंतर ‘ज्ञानियांचा राजा’, ‘माझा भाव तुझे चरणी’ हे अभंग गायले. यानंतर प्रसिद्ध नृत्यांगना व अभिनेत्री शर्वरी जमेनीस यांनी कथक नृत्य सादर केले. आपल्या सादरीकरणाची सुरुवात त्यांनी स्वरचित नृत्यवंदनेने केली. यानंतर ताल तीनतालमध्ये एकल नृत्य सादर केले. यात त्यांनी अभिनय रचना सादर केली. रामदास स्वामींची पत्नी लक्ष्मी हिचे भावबंध यातून त्यांनी मांडले.

तसेच एक लपछत कवितमध्ये त्रिपुरासुराची गोष्ट नृत्यातून मांडली. डॉ. चैतन्य कुंटे यांनी संगीतबद्ध केलेली पारंपरिक होरी सादर करून त्यांनी महोत्सवाच्या पहिल्या दिवसाची सांगता केली. त्यांच्या नृत्याने उपस्थितांची मने जिंकली. जमेनीस यांना नृत्यसाथ मुग्धा डिसुजा, वैष्णवी देशपांडे आणि संगदेव केली. तसेच निखिल फाटक यांनी तबलासाथ व सुरंजन खंडाळकर यांनी संवादिनी व स्वरसाथ केली. उद्या (१९ फेब्रुवारी) महोत्सवाच्या दुसऱ्या दिवशी अर्षद अली खान यांचे शास्त्रीय गायन होईल. त्यानंतर पं. अतुलकुमार उपाध्याय यांचे व्हायोलीन वादन होईल.