‘दगडूशेठ’ च्या श्रीं ची प्रतिष्ठापना आणि आॅनलाईन उत्सव शनिवारपासून
पुणे : श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळ च्यावतीने ट्रस्टच्या १२८ व्या वर्षानिमित्त गणेश चतुर्थीला शनिवार, दिनांक २२ आॅगस्ट रोजी सकाळी ११ वाजून १० मिनिटांनी श्री कसबा गणपती मंडळाचे अध्यक्ष श्रीकांत शेटे यांच्या हस्ते श्रींची प्राणप्रतिष्ठापना होणार आहे. वेदमूर्ती मिलींद राहुरकर आणि वेदमूर्ती नटराज शास्त्री यांच्या पौरोहित्याखाली हा सोहळा संपन्न होईल, अशी माहिती ट्रस्टचे अध्यक्ष अशोक गोडसे यांनी दिली.
* आॅनलाईन कार्यक्रम :-
ॠषीपंचमीनिमित्त रविवार, दिनांक २३ आॅगस्ट रोजी पहाटे ६ वाजता प्रातिनिधीक स्वरुपात महिला अथर्वशिर्ष पठण आणि श्री गणेशाची महाआरती आॅनलाईन पद्धतीने होणार आहे. कोरोनामुळे घरी राहून साधेपणाने आपण गणेशोत्सव साजरा करीत आहोत. यंदा सार्वजनिक प्रकारे कार्यक्रम करता येत नसला तरी ही अथर्वशिर्ष पठणाची परंपरा खंडित होणार नाही. ट्रस्टच्या @dagdushethganpati या यूट्यूब चॅनलवर लाईव्ह होणार आहे. घरबसल्या यामध्ये सहभागी होण्यासाठी व रजिस्टर करण्यासाठी http://dagdushethganpati.com/
* मंदिरात होणारे धार्मिक कार्यक्रम :-
मुख्य मंदिरामध्ये दररोज पहाटे ५ वाजता ब्रह्मणस्पती सुक्त, सकाळी ६ वाजता श्री गणपती महाअभिषेक, सकाळी ७.३० वाजता महाआरती, रात्री ८ वाजता विशेष महामंगल आरती होणार आहे. वेदमूर्ती मिलींद राहुरकर आणि वेदमूर्ती नटराज शास्त्री यांच्या पौरोहित्याखाली दररोज श्री गणेशयाग होणार आहे. यावर्षी भक्तांकरीता अभिषेक व्यवस्था आॅनलाईन पद्धतीने करण्यात आली आहे. भक्तांनी नाव व गोत्र नोंदणी केल्यास त्यांच्यावतीने मंदिरामध्ये गुरुजींद्वारे अभिषेक होऊ शकेल. मंदिरात दररोज सत्यविनायक पूजा होणार असून शनिवार, दिनांक २९ आॅगस्ट रोजी दुपारी ४ वाजता मंत्रजागर होईल. उत्सवात दिनांक ३१ आॅगस्टपर्यंत सायंकाळी ५ वाजता वेदमूर्ती मधुकर जांभेकर, वेदमूर्ती धनंजय घाटे यांच्या पौरोहित्याखाली श्रीं चे सहस्त्रावर्तन होणार आहे.