NICMAR विद्यापीठातर्फे 10 व्या ICCRIP 2026 चे आयोजन

पुणे : NICMAR विद्यापीठ, पुणे येथे 21-22 ऑगस्ट 2026 रोजी पुण्यातील बाणेर येथील विद्यापीठाच्या कॅम्पसमध्ये बांधकाम, रिअल इस्टेट, पायाभूत सुविधा आणि प्रकल्प व्यवस्थापनावरील 10 व्या आंतरराष्ट्रीय परिषदेचे (ICCRIP 2026) आयोजन करण्यात आले होते. विद्यापीठाच्या या प्रमुख आंतरराष्ट्रीय परिषदेचे भारताच्या बांधकाम क्षेत्राच्या भविष्याला आकार देणाऱ्या प्रमुख मुद्द्यांवर चर्चा करण्यासाठी उद्योग क्षेत्रातील अग्रणी, शिक्षणतज्ज्ञ, व्यावसायिक, संशोधक आणि तज्ज्ञांना एकत्र आणण्याचे उद्दिष्ट होते.

दोन दिवसीय ICCRIP हे बांधकाम, रिअल इस्टेट, पायाभूत सुविधा आणि प्रकल्प व्यवस्थापन क्षेत्रातील उदयोन्मुख घडामोडींवर ज्ञानाची देवाणघेवाण, संशोधन आणि संवादासाठी एक व्यासपीठ म्हणून काम करते. भारत आपल्या पायाभूत सुविधा आणि नागरीकरणाच्या वाढत्या प्रमाणात आणि गुंतागुंतीच्या गरजांना प्रतिसाद देत असताना, पहिल्या दिवशी शाश्वत नागरी विकास, संस्थात्मक क्षमता आणि प्रभावी प्रकल्प अंमलबजावणी यावर विशेष भर देण्यात आला.

याप्रसंगी बोलताना NICMAR विद्यापीठ, पुणेचे अध्यक्ष आणि ICCRIP 2026 चे मुख्य आधारस्थंभ डॉ. विजय गुपचूप म्हणाले, “भारताची शहरे आणि पायाभूत सुविधा ज्या वेगाने विस्तारत आहेत, त्या वेगामुळे आपण प्रकल्पांचे नियोजन, बांधकाम आणि अंमलबजावणी कशी करतो याबाबत नव्या विचारांची गरज निर्माण झाली आहे. ICCRIP 2026 मधील चर्चेतून हे अधोरेखित झाले की, शाश्वत विकास केवळ धोरण किंवा तंत्रज्ञानाच्या माध्यमातून साध्य होऊ शकत नाही; त्यासाठी कुशल व्यावसायिक, अधिक सक्षम संस्थात्मक क्षमता आणि शिक्षण क्षेत्र, उद्योग आणि धोरणकर्ते यांच्यात अधिक जवळचे सहकार्य आवश्यक आहे. बांधकाम क्षेत्राला समर्पित संस्था म्हणून ज्ञाननिर्मिती, भविष्यासाठी सज्ज मनुष्यबळ विकसित करणे आणि संशोधन व उद्योगातील अनुभव एकत्र आणून प्रत्यक्षातील आव्हानांवर उपाय शोधण्यासाठी व्यासपीठ उपलब्ध करून देत ही दरी भरून काढण्याची जबाबदारी NICMAR विद्यापीठाची आहे.”

“बिल्डिंग सस्टेनेबल सिटीज: ब्रिजिंग पॉलिसी, कॅपॅसिटी अँड प्रोजेक्ट डिलिव्हरी” या विषयावरील परिसंवाद हे पहिल्या दिवसाचे प्रमुख वैशिष्ट्य ठरले. या चर्चेत भारताच्या नागरी विकासाच्या महत्त्वाकांक्षा शाश्वत आणि प्रभावीपणे अंमलात आणल्या जाणाऱ्या प्रकल्पांमध्ये रूपांतरित करण्याबाबत उद्योग आणि शिक्षण क्षेत्रातील विविध दृष्टिकोन मांडण्यात आले. धोरण आणि प्रत्यक्ष अंमलबजावणी यांच्यातील दरी भरून काढण्याची, संस्थात्मक आणि व्यावसायिक क्षमता मजबूत करण्याची तसेच शिक्षण क्षेत्र, उद्योग आणि धोरणकर्ते यांच्यात अधिक व्यापक सहकार्य वाढवण्याची गरज या चर्चेत अधोरेखित करण्यात आली.

उद्घाटन सत्राला प्रमुख पाहुणे म्हणून सेमइंडिया प्रोजेक्ट्स लिमिटेडचे व्यवस्थापकीय संचालक श्री. जयंत बसू, तर सन्माननीय पाहुणे म्हणून CIB, UK चे मुख्य कार्यकारी श्री. डॉन वॉर्ड उपस्थित होते. यावेळी NICMAR विद्यापीठ, पुणेचे अध्यक्ष आणि ICCRIP 2026 चे मुख्य आधारस्थंभ डॉ. विजय गुपचूप, उद्योग आणि शिक्षण क्षेत्रातील वरिष्ठ प्रतिनिधी, NICMAR विद्यापीठाचे नेतृत्व, प्राध्यापक, संशोधक आणि विद्यार्थीही उपस्थित होते.

या व्यापक चर्चेत पायाभूत सुविधा आणि नागरी विकास अधिकाधिक गुंतागुंतीचा होत असताना प्रकल्प अंमलबजावणीचे बदलते स्वरूप यावरही भर देण्यात आला. बहुशाखीय क्षमता विकसित करण्याचे, प्रकल्पाच्या संपूर्ण प्रवासात शाश्वततेचा समावेश करण्याचे, शिक्षण क्षेत्र आणि उद्योग यांच्यातील ज्ञानाची देवाणघेवाण अधिक मजबूत करण्याचे आणि बांधकाम क्षेत्राच्या बदलत्या गरजांसाठी व्यावसायिकांना तयार करण्याचे महत्त्व वक्त्यांनी अधोरेखित केले.

परिसंवादाबरोबरच परिषदेत मुख्य व्याख्याने, तांत्रिक सत्रे आणि व्यावसायिकांच्या नेतृत्वाखालील चर्चांचाही समावेश होता. यामुळे संशोधक, शिक्षणतज्ज्ञ आणि उद्योग क्षेत्रातील व्यावसायिकांना बांधकाम, रिअल इस्टेट, पायाभूत सुविधा आणि प्रकल्प व्यवस्थापन क्षेत्रातील उदयोन्मुख पद्धती, संशोधन आणि बदलत्या आव्हानांवर आपले दृष्टिकोन मांडण्याची आणि त्यांचे आदानप्रदान  करण्याची संधी मिळाली.

ICCRIP 2026 मध्ये संशोधन पेपर्स, केस स्टडीज, व्यावसायिकांचे दृष्टिकोन, डॉक्टोरल कोलोक्वियम, हॅकाथॉन, पेपर डेव्हलपमेंट वर्कशॉप आणि एडिटर्स कॉन्क्लेव्ह तसेच इंडस्ट्री शोकेस या 7 प्रमुख विभागांचा समावेश आहे. आता 10 व्या वर्षात पदार्पण करणारी ICCRIP परिषद शिक्षण क्षेत्र आणि उद्योग यांच्यातील संवाद अधिक मजबूत करण्यासाठी तसेच बांधकाम, रिअल इस्टेट, पायाभूत सुविधा आणि प्रकल्प व्यवस्थापन क्षेत्रांच्या बदलत्या गरजांना प्रतिसाद देणाऱ्या संशोधन, ज्ञानाची देवाणघेवाण आणि चर्चांसाठी व्यासपीठ निर्माण करण्याच्या NICMAR विद्यापीठाच्या सातत्यपूर्ण प्रयत्नांचे प्रतिबिंब आहे.