भिमाकोरेगाव विजयस्तंभ शौर्यदिन अभिवादनास देशभरातील 30 अनुयायी येणार: राहुल डंबाळे

पुणे : 1जानेवारी रोजी होणारा भिमाकोरेगाव विजयस्तंभ अभिवादन सोहळ्या निमित्त अभिवादन करण्यासाठी महाराष्ट्र सह उत्तर प्रदेश, दिल्ली, कर्नाटक, मध्यप्रदेश, गुजरात सह संपूर्ण भारतभरातून तब्बल 30 लाख भिम अनुयायी अभिवादनासाठी दाखल होणार आहेत. अनुयायींची ही संख्या लक्षात घेवून जिल्हाधिकारी पुणे यांच्या अध्यक्षतेखालील समितीने सर्व पायाभूत सुविधा मोठया प्रमाणात उपलब्ध करुन दिलेल्या आहेत. भिमाकोरेगांव शौर्यदिनाच्या अनुषंगाने तसेच राज्यात अन्य कोणत्याही स्वरुपाचा तणाव नसल्याने अभिवादन सोहळा शांतते पार पडणार आहे अशी माहितील भिमाकोरेगांव विजयस्तंभ शौर्यदिन समितीचे अध्यक्ष राहुल डंबाळे यांनी दिली.
अनुयायीची वाढती संख्या लक्षात घेता यंदाच्या वर्षी शौर्यदिन अभिवादन सोहळा दि. 31 डिसेंबर व 01 जानेवारी या दोन दिवसाच्या कालावधीत आयोजित करण्यात आलेला आहे. दोन दिवसाच्या सोहळयाचे राज्यात सर्वत्र स्वागत होत असून 31 डिसेंबर रोजी अंदाजे 5 लाख अनुयायी अभिवादन करतील. ज्यात प्रामुख्याने ज्येष्ठ नागरीक, महिला, लहान मुले यांच्यासह कुटुंबासह अभिवादनला येणाऱ्यांचा सहभाग राहणार आहे.
31 डिसेंबर रोजी सकाळी 9 वाजल्यापासून विजयस्तंभ अभिवादनासाठी सर्व सजावटीसह संपूर्णपणे खुला राहणार असून भिमाकोरेगांव विजयस्तंभ शौर्यदिन समन्वय समितीसह अन्य आंबेडकरी पक्ष संघटनांचे विविध कार्यक्रम सुरु होणार आहेत.विविध शासकीयविभागामार्फत राबविण्यात येणाऱ्या विविध कल्याणकारी कार्यक्रमांचे उद्घाटन याच दिवशी होणार असून 31 डिसेंबरला मध्यरात्री 12 वाजता फटक्यांची भव्य आताशबाजी करण्यात येणार आहे.
1 जानेवारी रोजी पहाटे 6 वाजता राज्य शासनाच्या वतीने उपमुख्यमंत्री तथा पुणे जिल्हा पालकमंत्री अजितदादा पवार हे विजयस्तंभास मानवंदन देणार आहेत. यावेळी भिमाकोरेगाव शौर्यदिनासाठी कार्यरत राहिलेले पुण्याचे जिल्हाधिकारी डॉ. राजेश देशमुख यांचा स्मृती चिन्ह व मानपत्र देऊन अजित पवार यांच्या हस्ते विशेष सन्मान करण्यात येणार आहेत. त्यानंतर वंचित बहुजन आघाडीचे नेते मा. बाळासाहेब तथा प्रकाश आंबेडकर ,केंद्रीय सामाजिक न्यायमंत्री रामदासजी आठवले , रिपब्लिकन सेनेचे अध्यक्ष आनंदराज आंबेडकर , भिमआर्मीचे प्रमुख चंद्रशेखर आझाद , भारतीय बौध्द महासभेचे भिमराव आंबेडकर ,पिपल्स रिपब्लिकन पक्षाचे प्राध्यापक जोगेंद्र कवाडे सर, भारत मुक्ती मोर्चाचे वामन मेश्राम, भारतीय दलित कोब्राचे ॲड. भाई विवेक चव्हाण यांचेसह माजी मंत्री जितेंद्र आव्हाड , माजी मंत्री चंद्रकांत हंडोरे, गुजरातचे आमदार जिग्‍नेश मेवानी इत्यादी मान्यवर अभिवादन करणार आहेत.
सकाळी 8 : 30 वाजता समता सैनिक दलाची मानवंदना परेड अत्यंत दिमागदार पध्दतीने बॅन्डपथकासह संचलन करणार असून यात सुमारे 800 पेक्षा अधिक समता सैनिक सहभागी होणार आहेत.
सकाळी 9:30 वाजता 1 जानेवारी रोजीच भारतीय सैन्य दलातील महार रेजिरमेंटमधील निवृत्त 1500 सैनिकांची मानवंदना परेड आयोजित करण्यात आली असून त्यांचे वतीने पुष्पचक्र अर्पण करुन लष्करी इतमातील महार गान गायले जाणार आहे. यासाठी देशभरातील विविध भागातून निवृत्त सैनिक यात सहभाग होणार आहेत.
सकाळी 10:30 नंतर आंबेडकरी कार्यकर्त्यांनी निर्माण केलेली ढोल पथक तसेच ढोल लेझिम पथक हे देखील या सोहळयात सहभागी होणार आहेत.
अभिवादन सोहळयानिमित्त भारतीय दलित कोब्राचे भाई विवेक चव्हाण, रिपब्लिकन सेनेचे आनंदराज आंबेडकर यांचेसह पिपल्स रिपब्लिकन पक्षाचे प्राध्यापक जोगेंद्र कवाडे यांच्या अभिवादन सभा परिसरात होणार आहेत.
जिल्हा प्रशासनाने गेल्या 3 महिन्यांपासून भिमाकोरेगांव विजयस्तंभ शौर्यदिन समन्वय समिती यांच्या समवेत अनेकदा संयुक्त बैठका घेवून त्यातील सूचनांच्या आधारेच यंदाच्या वर्षी सर्वोत्तम नियोजन केले असून या नियोजनाबद्दल समन्वय समिती समाधानी आहे. व संपूर्णपणे ठरलेल्या नियोजनाची अंमलबजावणी करण्यासंदर्भात प्रयत्नशिल आहेत.
यंदाच्या वर्षी आंबेडकरी साहित्य तसेच पुस्तक विक्रेत्यांना विजयस्तंभालगतच जागा उपलब्ध करुन दिली असल्यामुळे पुस्तक विक्रेत्याबरोबरच अनुयायांमध्ये देखील आनंदाचे वातावरण आहे. चैत्यभूमीप्रमाणेच याठिकाणीदेखील करोडो रुपयांची साहित्यांची खरेदी केली जाणार आहे.
15 हजार शासकीय निमशासकीय कर्मचारी या उत्सवाच्या यशस्वीतेसाठी अहोरात्र प्रयत्न करत असल्यमुळे हा उत्सव अत्यंत आनंदात पार पडणार आहे. तसेच एवढया मोठया संख्येने सर्व शासकीय कर्मचारी काम करीत असल्याने आता हा उत्सव सर्व समावेशक झाला
असून हा देशाच्या मुख्य उत्सावामध्ये गणला जात आहे ही आमच्यासाठी अत्यंत अभिमानाची बाब आहे असे मत रिपब्लिकन पक्षाचे परशूराम वाडेकर यांनी मांडले. दरम्यान विजयस्तंभावर संविधानाच्या अमृत महोत्सवी वर्षाच्या अनुषंगाने संविधाची प्रतिकृती लावण्यात यावी अशी मागणी समितीच्या वतीने आम्ही केली होती ती देखील मान्य केल्याचा आनंद वाटत असल्याचे वाडेकर यांनी सांगितले.

विजयस्तंभ शौर्यदिन अनुषंगाने देशभरातील अनुयायी दाखल होणार असल्याने त्यांच्या स्वागतासाठी पुणे शहर व जिल्हयातील सर्वच आंबेडकरी पक्ष संघटना एकत्रितपणे सज्ज झाल्या असून अनुयायांना सर्व तऱ्हेची सुरक्षा व्यवस्था व अन्य पायाभूत सुविधा पुरविण्यासाठी आम्ही समन्वय समितीच्या माध्यमातून 3 महिन्यांपासून प्रयत्नशिल आहोत या दरम्यान पोलीस आयुक्त, जिल्हाधिकारी, जिल्हा परिषद सी ओ, बार्टी महासंचालक, समाज कल्याण आयुक्त यांच्या समवेत सातत्याने बैठका घेत आहोत. अशी माहिती माजी उपमहापौर डॉ. सिध्दार्थ धेंडे यांनी दिली. सध्या देशभरामध्ये कोविड 19 सबव्हायरंट जे.एन. 1 ची शक्यता निर्माण झालेली आहे. त्या पार्श्वभूमीवर तसेच धूळीपासून संरक्षण व्हावे म्हणून अनुयायांनी शक्यतो मास्कचा वापर करावा असे आव्हान समिती व्दारे करण्यात येत आहे असेही धेंडे यांनी सांगितले. यासंपूर्ण उत्सवात महिलांची वाढती संख्या लक्षात घेवून महिलांसाठीचे स्वतंत्र नियोजन जिल्हा प्रशासनाच्यावतीने करण्यात आलेले आहे. महिला सुरक्षितेसोबतच महिलांच्या दागिण्यांची चोरी होवू नये म्हणून पोलीसांकडून विशेष काळजी घेतली जात आहे. तसेच जिल्हा परिषदेकडून हिरकणी कक्ष व आरोग्य केंद्रांची उभारणी केली जात आहे यामुळे महिला वर्ग मोठया संख्येने या उत्सवात सहभागी होईल असे मत सुवर्णा डंबाळे यांनी मांडले. तरी सदर पत्रकर परिषदेव्दारे राज्यातील व देशातील आंबेडकरी अनुयायांनी कोणत्याही अफवांना थारा न देता भिमाकोरेगांव शौर्यदिन अभिवादन सोहळयात सहभागी व्हावे . सदर पत्रकार परिषदेत राहुल डंबाळे, डॉ. सिध्दार्थ धेंडे, परशूराम वाडेकर, सुवर्णा डंबाळे, स्नेहा माने आदिपदाधिकारी सहभागी होते.