दोहा, कतार येथील जागतिक व आशियाई स्नूकर स्पर्धेत पंकज अडवानी विजेता

पुणे : दोहा, कतार येथे पार पडलेल्या जागतिक आणि आशियाई स्नूकर अजिंक्यपद स्पर्धेत भारताचा सर्वोत्तम स्नूकर खेळाडू पंकज अडवानीने विजतेपद पटकावत आपल्या खात्यात 24 वे जागतिक सुवर्णपदक आणि आशियाई अजिंक्यपद स्पर्धा असे दोन बहुमान पटकावले. हौशी स्नूकर गटात त्याने ही लक्षवेधी कामगिरी केली. 

जागतिक स्नूकर स्पर्धेच्या अंतिम फेरीत चुरशीच्या लढतीत पाकिस्तानचा बाबर मसिह याच्या विरुद्ध पंकज अडवानीने 7-5 असा विजय मिळवला. सामन्यात 2-6 अश्या फरकाने पिछाडीवर असलेल्या बाबरने 5-6 असे पुनरागमन केले होते. परंतु पंकजने आपली आघाडी कायम ठेवत विजेतेपद पटकावले. तसेच, आशियाई सिक्स रेड स्नूकर स्पर्धेत पंकजने इराणच्या आमिर सरखोशचा 6-3 असा पराभव करून विजतेपदाला गवसणी घातली. त्याचे आशियाई स्पर्धेतील हे सलग दुसरे सुवर्णपदक असून याआधी 2019 मध्ये त्याने हि कामगिरी केली होती.