Wednesday, November 18, 2026
Latest NewsPUNE

अंदाजपत्रकात नागरिकांच्या सूचनांना स्थान देण्याची मागणी

पुणे:  महापालिकेच्या २०२१-२२ च्या अंदाजपत्रकात विकासकामांच्या संदर्भात नागरिकांच्या सूचनांना स्थान देण्याची मागणी स्वयंसेवी संस्थांच्या वतीने पालिका आयुक्तांकडे करण्यात आली आहे.आयुक्तांनी अर्थसंकल्प सादर केल्यावर स्थायी समिती अध्यक्ष,नगरसेवकांनी सुचविलेल्या कामांच्या ‘स ‘ यादीतील अनावश्यक कामांसाठी पुणेकर करदात्यांचा पैसा उधळू नये.सार्वजनिक स्वच्छतागृहे,कचरा नियोजन व व्यवस्थापन,छोट्या बाजारपेठा,वाहनतळ,मूलभूत गरजांच्या पूर्ततेसाठी आवश्यक तरतूद करावी,अशी मागणी ‘इनक्रेडिबल समाजसेवक ग्रुप’ च्या वतीने अध्यक्ष असलम इसाक बागवान यांनी पत्रकाद्वारे केली आहे.

‘गरीब-श्रमिक वर्गामध्ये ज्या सोयीसुविधांचा अभाव आम्हाला जाणवतो त्यांच्या पूर्ततेसाठी धोरणात्मक निर्णय घेतले जावे व त्यासाठी अंदाजपत्रकात पुरेशी तरतूद केली जावी,कोरोना साथीनंतर पालिकेची अर्थव्यवस्था अजून सुधारलेली नाही हेही लक्षात घ्यावे’,असे या पत्रकात म्हटले आहे.

‘इनक्रेडिबल समाजसेवक ग्रुप’ ने सुचविलेली कामे पुढीलप्रमाणे :

  1. कोविडच्या काळात एकूणच जनजीवन विस्कळीत झाले ते अद्याप पूर्वपदावर आलेले नाही. अद्यापही रोजगार संपूर्णपणे सुरू झाला नाही. हजारो लोक बेरोजगार झालेले आहेत. अशा स्थितीत मूलभूत गरजांची पूर्तता करण्यास बजेटमध्ये तरतूद व त्यासाठी पुरेसा निधी उपलब्ध होणे आवश्यक आहे. 
  2. सार्वजनिक स्वच्छतागृहांची पुरेशी व्यवस्था करावी. खास करून नव्याने विकसित होत असलेल्या भागात सार्वजनिक स्वच्छतागृहांची सोय नाही, ती लवकरात लवकर केली जावी. 
  3. वस्ती पातळीवर घंटागाड्या, रहिवासी सोसायट्या व शहर भागात एकत्रितपणे नियमित कचरा उचलण्याची व्यवस्था अपुरी आहे. ती पुरेशी करण्यात यावी. याशिवाय, किमान दर 500 मीटर्सवर सार्वजनिक कचराकुंड्या उपलब्ध कराव्या व तेथील कचराही नियमितपणे उचलला जाईल अशी व्यवस्था करावी. त्यासाठी आवश्यक ती तरतूद अंदाजपत्रकात करण्यात यावी.
  4.  गावठाणांमध्ये अनधिकृत बांधकामांमुळे तसेच अनधिकृत दुकाने, फेरीवाले, भाजीवाले इत्यादी व्यावसायिकांमुळे आधीच अरुंद असलेले रस्ते अधिक अरुंद बनत आहेत व अनेक ठिकाणी रहदारीला अडथळा ठरत आहेत.  त्यासाठी पर्यायी जागा उपलब्ध होणे आवश्यक आहे. 
  5. मध्यवर्ती भागातील महापालिकेच्या आरक्षित जागांमध्ये सार्वजनिक पार्किंगची व्यवस्था केली जावी  वरील सर्व कार्यामध्ये रोजगारनिर्मितीही होईल व त्यातून बेरोजगार हाताना काम मिळून त्यांची क्रयशक्तीही वाढेल व पर्यायाने महानगरपालिकेच्या कार्यकक्षेतील नागरी जीवनाची स्थिती सुधारून महापालिकेच्या महसुलातही वाढच होईल. या सर्व मुद्द्यांचा अंदाजपत्रकात प्राधान्याने विचार व्हावा .
    शहरातील विकासकार्य व त्याची तरतूद या संदर्भात वॉर्ड स्तरावर नागरिकांच्या सहभागाने प्राधान्यक्रमाची निश्चिती व्हावी

Leave a Reply