पुणे महापालिका बनावट भरती घोटाळ्यात मुख्य सूत्रधार डॉ. राजेंद्र खेडेकर अटकेत

पुणे : पुणे महानगरपालिकेतील बहुचर्चित बनावट नोकरभरती घोटाळ्याप्रकरणी शिवाजीनगर पोलिसांनी मोठी कारवाई करत मुख्य सूत्रधार डॉ. राजेंद्र खेडेकर याला अटक केली आहे. गेल्या सुमारे दोन महिन्यांपासून तो पोलिसांना चकवा देत फरार होता. पोलिसांनी सापळा रचून त्याला ताब्यात घेतले.

खेडेकरला न्यायालयासमोर हजर करण्यात आल्यानंतर न्यायालयाने त्याला पाच दिवसांची पोलीस कोठडी सुनावली. या कालावधीत त्याच्याकडून भरती घोटाळ्याबाबत महत्त्वाची माहिती मिळविण्याचा प्रयत्न पोलिसांकडून केला जाणार आहे.
पुणे महापालिकेत कायमस्वरूपी नोकरी लावून देण्याचे आमिष दाखवून शेकडो बेरोजगार तरुण-तरुणींची फसवणूक केल्याचा आरोप या प्रकरणातील आरोपींवर आहे. नोकरी मिळवून देण्याच्या नावाखाली उमेदवारांकडून रोख रक्कम तसेच धनादेशाच्या माध्यमातून कोट्यवधी रुपये उकळण्यात आल्याचा आरोप आहे.

विशेष म्हणजे, पैसे घेतल्यानंतर उमेदवारांचा विश्वास संपादन करण्यासाठी त्यांना महापालिकेच्या नावाने बनावट नियुक्तीपत्रे देण्यात आल्याचे तपासात समोर आले आहे. त्यामुळे अनेक उमेदवारांची आर्थिक फसवणूक झाल्याचे पोलिसांच्या तपासातून स्पष्ट होत आहे.
या संपूर्ण रॅकेटमध्ये आणखी कोणाचा सहभाग आहे, उमेदवारांकडून नेमकी किती रक्कम वसूल करण्यात आली आणि या पैशांचे पुढे काय करण्यात आले, याचा तपास पोलीस करत आहेत. तसेच बनावट नियुक्तीपत्रे तयार करण्यामागे कोण होते आणि या प्रकरणात आणखी किती जण सहभागी आहेत, याचीही चौकशी केली जात आहे.
डॉ. खेडेकरच्या अटकेमुळे या प्रकरणातील आर्थिक व्यवहार आणि कथित भरती रॅकेटची कार्यपद्धती उघड होण्याची शक्यता असून, त्याच्या पोलीस कोठडीतील चौकशीतून घोटाळ्याबाबत आणखी महत्त्वाची माहिती समोर येण्याची अपेक्षा आहे.