यकृत प्रत्यारोपणासाठी पिंपरीतील ‘डीपीयू सुपर स्पेशालिटी हॉस्पिटल’चा ‘मिराई हॉस्पिटल’शी भागीदारी

पुणे : विशेष वैद्यकीय सेवांचा विस्तार करण्यासाठी आणि जागतिक दर्जाच्या यकृत प्रत्यारोपण (Liver Transplant) सुविधा रुग्णांना सहज उपलब्ध करून देण्यासाठी पिंपरी, पुणे येथील डीपीयू (DPU) सुपर स्पेशालिटी हॉस्पिटल आणि चेन्नईच्या रेला हॉस्पिटल प्रा. लि. द्वारे संचलित ‘मिराई हॉस्पिटल’ (मिराई सेंटर फॉर ट्रान्सप्लांट एक्सलन्स) यांच्यात एक महत्त्वपूर्ण सामंजस्य करार (MoU) करण्यात आला आहे. यकृत प्रत्यारोपण आणि प्रगत हेपॅटोबिलियरी (यकृत, पित्ताशय आणि स्वादुपिंड संबंधित) उपचारांच्या क्षेत्रात सहकार्य करण्यासाठी हा धोरणात्मक करार करण्यात आला आहे.

या सामंजस्य करारावर सौ. डॉ. भाग्यश्रीताई पी. पाटील (प्र कुलपती, डॉ. डी. वाय. पाटील विद्यापीठ (अभिमत विद्यापीठ), डीपीयू सुपर स्पेशालिटी हॉस्पिटल, पिंपरी, पुणे आणि डॉ. मोहम्मद रेला (अध्यक्ष व व्यवस्थापकीय संचालक, रेला हॉस्पिटल आणि संस्थापक संचालक, इन्स्टिट्यूट ऑफ लिव्हर डिसीज अँड ट्रान्सप्लांटेशन) यांनी स्वाक्षऱ्या केल्या. या भागीदारीमुळे पश्चिम भारतातील रुग्णांना यकृत प्रत्यारोपणाच्या सर्वसमावेशक सुविधा अत्यंत सुलभतेने उपलब्ध होणार आहेत.

या सहकार्यांतर्गत, मिराई हॉस्पिटल आपली विशेष तज्ज्ञता, अनुभवी प्रत्यारोपण पथक (Transplant Team) आणि वरिष्ठ वैद्यकीय नेतृत्व प्रदान करेल; तर डीपीयू सुपर स्पेशालिटी हॉस्पिटल यकृत प्रत्यारोपण सेवा आणि संबंधित वैद्यकीय काळजी अखंडपणे देण्यासाठी आवश्यक पायाभूत सुविधा, अद्ययावत यंत्रणा आणि कार्यात्मक सहाय्य उपलब्ध करून देईल. 6,000 हून अधिक यशस्वी यकृत प्रत्यारोपणांचा अनुभव असलेले आणि सर्वात लहान बालकावर यशस्वी यकृत प्रत्यारोपण करून ‘गिनीज वर्ल्ड रेकॉर्ड‘मध्ये नोंद असलेले डॉ. मोहम्मद रेला हे या भागीदारीला त्यांचे विलक्षण शल्यचिकित्सेचे कौशल्य आणि जागतिक दर्जाचे वैद्यकीय नेतृत्व लाभवून देणार आहेत.

डॉ. पी. डी. पाटील (कुलपती, डॉ. डी. वाय. पाटील विद्यापीठ (अभिमत विद्यापीठ), पिंपरी, पुणे):

“अवयव प्रत्यारोपणासारख्या अत्यंत संवेदनशील आणि विशेष उपचारांच्या बाबतीत आरोग्य सेवा संस्थांची समाजाप्रती मोठी जबाबदारी असते. मिराई हॉस्पिटल आणि डॉ. मोहम्मद रेला यांच्यासोबतची आमची भागीदारी पश्चिम भारतात प्रगत यकृत प्रत्यारोपण सेवा मजबूत करण्याच्या दिशेने एक महत्त्वाचे पाऊल आहे. डीपीयूमध्ये आमचा प्रयत्न नेहमीच ज्ञान, करुणा आणि सेवा यांचा मेळ घालणाऱ्या संस्था उभारण्याचा राहिला आहे. या भागीदारीच्या माध्यमातून रुग्णांना आणि त्यांच्या कुटुंबांना दर्जेदार उपचार आणि जागतिक दर्जाच्या वैद्यकीय तज्ज्ञतेचा लाभ मिळेल, असा आम्हाला विश्वास आहे.”

सौ. डॉ. भाग्यश्रीताई पी. पाटील (प्र–कुलपती, डॉ. डी. वाय. पाटील विद्यापीठ (अभिमत विद्यापीठ), पिंपरी पुणे) म्हणाल्या “डीपीयू सुपर स्पेशालिटी हॉस्पिटलमध्ये प्रत्येक रुग्णाला प्रगत आणि जागतिक दर्जाची आरोग्यसेवा उपलब्ध करून देणे हेच आमचे ध्येय राहिले आहे. डॉ. मोहम्मद रेला आणि मिराई हॉस्पिटलसोबतचे हे सहकार्य यकृत प्रत्यारोपण सेवा बळकट करणारा एक ऐतिहासिक टप्पा आहे. आमच्या भक्कम पायाभूत सुविधा आणि रुग्ण–केंद्रित दृष्टिकोनाला मिराई हॉस्पिटलच्या यकृत प्रत्यारोपणातील अजोड कौशल्याची साथ देऊन, आम्ही सर्वसमावेशक आणि उच्च दर्जाची यकृत काळजी देणारे एक ‘उत्कृष्टता केंद्र‘ (Centre of Excellence) निर्माण करत आहोत.”

डॉ. यशराज पी. पाटील (विश्वस्त व खजिनदार, डॉ. डी. वाय. पाटील विद्यापीठ (अभिमत विद्यापीठ), पिंपरी, पुणे): म्हणाले

“यकृत प्रत्यारोपणासाठी सर्वोच्च पातळीवरील वैद्यकीय समन्वय, प्रगत पायाभूत सुविधा, आधुनिक तंत्रज्ञान आणि अतिदक्षता उपचार गटाच्या (Critical Care Team) भक्कम पाठबळाची गरज असते. डीपीयू सुपर स्पेशालिटी हॉस्पिटलमध्ये आम्ही क्लिष्ट आणि बहुशाखीय उपचारांना सक्षम करणाऱ्या प्रणालींमध्ये सातत्याने अग्रेसर आहोत. हे सहकार्य शल्यचिकित्सेचे कौशल्य, तंत्रज्ञान–सक्षम उपचार पद्धती आणि रुग्णालयाच्या पायाभूत सुविधांना एकत्र आणून प्रगत यकृत उपचारांसाठी एक भक्कम व्यासपीठ तयार करेल.”

डॉ. मोहम्मद रेला (अध्यक्ष व व्यवस्थापकीय संचालक, रेला हॉस्पिटल आणि संस्थापक संचालक, इन्स्टिट्यूट ऑफ लिव्हर डिसीज अँड ट्रान्सप्लांटेशन): म्हणाले “डीपीयू संस्थेसोबत भागीदारी करताना आम्हाला अत्यंत आनंद होत आहे. पिंपरीतील डीपीयू सुपर स्पेशालिटी हॉस्पिटलमध्ये यकृत प्रत्यारोपणासाठी आवश्यक असलेले अत्याधुनिक जागतिक दर्जाचे इन्फ्रास्ट्रक्चर तर उपलब्ध आहेच, सोबतीला पुरावा–आधारित औषधोपचार (Evidence-based medicine) करण्याच्या आमच्या संस्कृतीशी त्यांची विचारसरणी तंतोतंत जुळणारी आहे. एकत्रितपणे, आम्ही प्रगत यकृत उपचारांची उपलब्धता वाढवण्यासाठी आणि रुग्णांना तज्ज्ञता व संवेदनशील सेवेचा लाभ देण्यासाठी उत्सुक आहोत.”