उस्ताद रशिद खान यांचे निधन

राशिद खान २० -२१ वर्षांचे असताना १९८६ -८७ साली सवाई गंधर्व महोत्सवात मी त्यांचे गायन पहिल्यांदा ऐकले होते. त्या वेळी दिसायला ते अगदी किडकिडीत होते मात्र त्यांच्या बुलंद, गोल आणि सुंदर आवाजाने पुणेकरांवर खास प्रभाव पाडला. उस्ताद राशिद खान हे भारतरत्न पंडित भीमसेन जोशी यांचे भक्त होते, त्यामुळे आमच्यात मित्रत्वाचे नाते निर्माण झाले. २००० सालाच्या आधी आम्ही पुणे, मुंबई येथे अनेक ठिकाणी भेटायचो. ते दोन वेळा आमच्या घरी खाजगी मैफलीत गायले होते. खानदानी व संगीताची सौदर्यदृष्टी असलेले व्यक्तीमत्त्व आज आपण गमावले आहे. वागायला बोलायला उस्ताद राशिद खान अगदी साधे होते. त्यांच्या वागण्यात कधीही मोठेपणा नसायचा. आयुष्याच्या पूर्वार्धात खडतर परिस्थितीत त्यांनी संगीतसाधना केली होती. आज त्यांच्या विषयीच्या अनेक आठवणी डोळ्यांसमोर तरळून गेल्या. ईश्वर त्यांच्या आत्म्याला शांती देवो हीच प्रार्थना.  

राहुल देशपांडे, राष्ट्रीय पुरस्कार विजेते गायक