पुण्यात होणार भव्य पॉटरी फेस्टिव्हलचे आयोजन

सदर महोत्सवाचे हे तिसरे वर्ष असून येत्या शुक्रवार दि. २० ते रविवार दि २२ ऑक्टोबर आणि २७ ते २९ ऑक्टोबर, २०२३ दरम्यान दोन टप्प्यांत सेनापती बापट रस्त्यावरील पॅव्हेलियन या ठिकाणी सकाळी ११ ते रात्री ९ दरम्यान महोत्सवाचे आयोजन करण्यात आले आहे. महोत्सव सर्वांसाठी विनामूल्य खुला असेल याची कृपया नोंद घ्यावी.याबद्दल अधिक माहिती देताना इंद्रनील गरई म्हणाले, “देशातील महत्त्वाचा महोत्सव म्हणून हा पुणे पॉटर्स मार्केट ओळखले जाते. महोत्सवात प्रत्येक टप्प्यात २४ याप्रमाणे दोन टप्प्यांत सहभागी होणारे देशभरातील ४८ पॉटर्स हे यावर्षी विशेष आकर्षण असणार असून यामध्ये प्रामुख्याने स्टुडीओ पॉटर्स आणि आपल्या कलेला हाताने मूर्त रूप देणारे कलाकार यांचा सहभाग असेल. दैनंदिन जीवनात उपयोगी पडणाऱ्या, वापरात येणाऱ्या मातीच्या वस्तू, सिरॅमिकमध्ये बनविलेली शिल्पे, भित्तिचित्रे, दागिने आणि विशेष कलाकृती यांचा सहभाग महोत्सवात असेल. यामध्ये पुण्यासोबतच मुंबई, रायगड, मेहसाना, बंगळूरू, गोवा, कलकत्ता, अहमदनगर या भागातील कलाकार सहभागी होणार आहेत.”

मातकाम ही सर्वात जुनी आणि गेली कित्येक शतके मानवाला अवगत असलेली कला असून सर्व वयोगटातील नागरिकांसाठी मातकलेच्या खास संवादात्मक कार्यक्रमाचे व मातीच्या भांडयाचे रंगकाम करणाऱ्या कार्यशाळेचे आयोजन या पुण्यातील महोत्सवात करण्यात आले असल्याची माहितीही गरई यांनी दिली.