स्वातंत्र्याची अमृतगाथा’ महानाट्यातून उलगडणार भारताचा इतिहास 

पुणे : भारतीय स्वातंत्र्याच्या अमृतमहोत्सवी वर्षानिमित्त प्राचीन भारतापासून ते अगदी आजपर्यंतच्या भारताचा इतिहास ‘स्वातंत्र्याची अमृतगाथा’ या महानाटयातून पुण्यात तब्बल ११०० विद्यार्थी उलगडणार आहेत. शि.प्र.मंडळीच्या एस.पी.एम.इंग्लिश स्कूल सदाशिव पेठ तर्फे आयोजित महानाटयाचे सादरीकरण रविवार, दिनांक २२ जानेवारी रोजी सायंकाळी ६.३० वाजता स.प.महाविद्यालयाच्या हॉकीच्या मैदानावर होणार आहे, अशी माहिती शाळेच्या मुख्याध्यापिका रमा कुलकर्णी यांनी दिली.

प्राचीन भारतातील चाणक्य-चंद्रगुप्त मौर्य त्यानंतर छत्रपती शिवाजी महाराजांचा कालखंड, १८५७ चे स्वातंत्र्यसमर, वासुदेव बळवंत फडके, लोकमान्य टिळक, स्वातंत्र्यवीर सावरकर, महात्मा गांधी, नेताजी सुभाषचंद्र बोस, सरदार वल्लभभाई पटेल, डॉ.बाबासाहेब आंबेडकर, महात्मा फुले, सावित्रीबाई फुले, अहिल्याबाई होळकर यांचे कार्य नाटकातून उलगडणार आहे. तसेच भारतीय स्वातंत्र्यानंतर महिला सबलीकरण, हरितक्रांती, उद्योगधंद्यांचा विकास, अण्वस्त्र चाचणी, इस्त्रो, भारतीय सैन्य यापासून ते भारतीय अध्यात्म असे अनेक आयाम हे नाट्य प्रसंगातून सादर होणार आहेत.