मॉन्सूनची प्रतीक्षा कायम; विदर्भात उष्णतेचा ऑरेंज अलर्ट, शेतकऱ्यांची चिंता वाढली

पुणे  : महाराष्ट्रात मॉन्सूनच्या आगमनाला विलंब होत असल्याने शेतकऱ्यांची चिंता वाढली आहे. एल निनोच्या प्रभावामुळे यंदा राज्यात सरासरीपेक्षा कमी पाऊस पडण्याची शक्यता व्यक्त करण्यात आली असून, जून महिन्याचा मध्य जवळ आला तरी राज्यातील अनेक भागांत समाधानकारक पाऊस झालेला नाही. त्यामुळे खरीप हंगामातील पेरण्या रखडल्या आहेत.
कृषी विभागाने शेतकऱ्यांना घाईघाईने पेरणी न करण्याचे आवाहन केले आहे. विभागाकडून अधिकृत सूचना मिळेपर्यंत पेरणी टाळल्यास दुबार पेरणीचे संकट टाळता येईल, असे सांगण्यात आले आहे. मात्र, काही भागांत शेतकऱ्यांनी पावसाच्या अपेक्षेने पेरणी सुरू केली आहे.

हवामान विभागाच्या अंदाजानुसार १५ जूननंतर राज्यात मॉन्सूनला गती मिळण्याची शक्यता आहे. त्यानंतर अनेक भागांत पावसाचे प्रमाण वाढू शकते. सध्या मात्र पावसाऐवजी उष्णतेचा प्रभाव वाढताना दिसत आहे.
दरम्यान, भारतीय हवामान विभागाने विदर्भातील काही जिल्ह्यांसाठी उष्णतेच्या लाटेचा ऑरेंज अलर्ट जारी केला आहे. काही ठिकाणी तापमान ४२ अंश सेल्सिअसपेक्षा अधिक जाण्याचा अंदाज व्यक्त करण्यात आला आहे. मुंबई, ठाणे, रायगड आणि अकोला जिल्ह्यांमध्येही दमट व उष्ण हवामान राहण्याची शक्यता वर्तवण्यात आली आहे.
देशातील अनेक राज्यांमध्ये मुसळधार पाऊस आणि वादळी वाऱ्यांचा इशारा देण्यात आला असताना महाराष्ट्रात मात्र पावसाची प्रतीक्षा कायम आहे. त्यामुळे शेतकरी, नागरिक आणि प्रशासनाचे लक्ष आता १५ जूननंतरच्या हवामान परिस्थितीकडे लागले आहे.