उस्ताद हमीद खान यांच्या स्मरणार्थ १८ जानेवारी रोजी रिवायत कार्यक्रमाचे आयोजन

पुणे  : सतारवादनाला एका उंचीवर नेऊन ठेवत त्यासोबत इतर वाद्यांचे वादन व गायन यांचा मेळ घालीत कार्यक्रम करण्याची मुहूर्तमेढ रोवणाऱ्या प्रसिद्ध सतार वादक उस्ताद हमीद खान यांच्या स्मरणार्थ पुण्यातील सतारवादक रईस खान यांच्या सुहाना बसंत या संस्थेच्या वतीने दरवर्षी प्रमाणे याही वर्षी ‘रिवायत’ या कार्यक्रमाचे आयोजन करण्यात आले आहे.

येत्या रविवार दि. १८ जानेवारी रोजी घोले रस्त्यावरील पं. जवाहरलाल नेहरू सांस्कृतिक भवनातील सभागृहात सकाळी १० वाजल्यापासून सदर कार्यक्रम संपन्न होणार असून त्यासाठी प्रथम येणाऱ्यास प्राधान्य या तत्त्वावर सर्वांना विनामूल्य प्रवेश देण्यात येईल. ज्येष्ठ सतारवादक उस्ताद उस्मान खान यांच्या उपस्थितीत महोत्सवाचे औपचारिक उद्घाटन संपन्न होईल अशी माहिती रईस खान यांनी कळविली आहे.

रिवायत या कार्यक्रमाचे हे सलग चौथे वर्ष असून कार्यक्रमाची सुरुवात दिल्लीस्थित संतूरवादक डॉ. बिपुल कुमार राय यांच्या वादनाने होईल. डॉ. राय हे पद्मश्री पं. भजन सोपोरी यांचे शिष्य असून रागांजली अकादमी ऑफ परफॉर्मिंग आर्ट्स या संस्थेच्या माध्यमातून ते भारतीय शास्त्रीय संगीताचा प्रचार करीत आहेत.यानंतर ख्यातनाम गायिका, संगीतकार डॉ. वीणा सहस्रबुद्धे यांचे शिष्य आणि पुण्याचे प्रसिद्ध गायक अतुल खांडेकर यांचे गायन संपन्न होईल. रिवायत कार्यक्रमाचा समारोप त्रिगुणा स्कूल ऑफ परफॉर्मिंग आर्ट्सच्या विद्यार्थ्यांच्या ‘सुकून’ आणि ‘शकरगुजारी’ या सामुहिक सतारवादन व समूहगायनाच्या कार्यक्रमाने होईल. संपूर्ण कार्यक्रमामध्ये पांडुरंग पवार, प्रणव गुरव, अमोल माळी, कार्तिक भालेराव, गंगाधर शिंदे आणि मालू गावकर हे कलाकार साथसंगत करतील. कार्यक्रमाचे सूत्रसंचालन मयुरी पंचवाडकर या करतील असेही रईस खान यांनी सांगितले.