नाविन्याचा ध्यास, प्रयोगशील वृत्ती जोपासावी – शुभांगी शिंदे यांचे मत

मराठवाडा मित्र मंडळाच्या व्यावसायिक अभ्यासक्रम विभागामार्फत राष्ट्रीय शिक्षक दिनाच्या निमित्ताने आयोजित कार्यशाळेत शुभांगी शिंदे बोलत होत्या. प्रसंगी ज्येष्ठ शिक्षक स्थापत्य अभियंता सुभाष पत्की, उपप्राचार्य प्रा. रमेश पंडित, व्यावसायिक अभ्यासक्रमाच्या ज्येष्ठ शिक्षिका डॉ. सुजाता शेणई, पर्यवेक्षक राजेंद्र खजुरे, प्रा. के. बी. पवार व प्रा. सुनील पवार उपस्थित होते.

शुभांगी शिंदे म्हणाल्या, “राइट बंधूंना विमान तयार करण्याकरिता त्यांच्या गॅरेजमध्ये अनेक प्रयोग करावे लागले. अनेकदा लोकांनी त्यांना ‘तुम्ही कधीच यशस्वी होणार नाही’ असे ऐकवले. मात्र, त्यांनी जिद्द आणि प्रयोगशील वृत्ती सोडली नाही. मोकळ्या रानात जाऊन पक्षांचे निरीक्षण करून त्यांनी विमान तयार केले. शेवटी त्यांना त्यात यश मिळाले. त्यामुळे आपण जिद्द आणि प्रयोगशीलता अंगीकारावी.”

‘सध्या स्वतःच्या पायावर उभे राहण्याकरिता कौशल्याधारित अभ्यासक्रम महत्त्वाचे आहेत. महाविद्यालयातील अनेक विद्यार्थी व्यवसाय शिक्षण घेऊन मोठे उद्योजक झाले आहेत. त्यांच्याकडून महाविद्यालयातील विद्यार्थ्यांना रोजगाराच्या संधी मिळत असून, काही दिवस अनुभव घेऊन विद्यार्थी स्वतःचा व्यवसाय सुरू करत आहेत,’ असे प्रा. रमेश पंडित यांनी प्रास्ताविकात सांगितले.