‘शाहिरी भीमवंदनेतून’ महामानवाला अभिवादन

पुणे : जन्मले भीमराव आंबेडकर, करण्या दलितांचा उद्धार … अशा शब्दांत डॉ.बाबासाहेब आंबेडकर यांचा जीवनपट व त्यांनी दिलेली शिकवण पोवाडयांच्या माध्यमातून सादर करीत शाहिरांनी महामानवाला अभिवादन केले. पुणे आणि परिसरातील विविध आठ पुतळ््यांसमोर चैतन्य भीमरथ या फिरत्या रंगमंचाद्वारे शाहिरी भीमवंदना हा पोवाडयाचा कार्यक्रम सादर करुन अनोखी मानवंदना देण्यात आली.

शाहीर हिंगे लोककला प्रबोधिनी व शाहीर देवा कांबळे लोककला मंच तर्फे भारतीय स्वातंत्र्याचा अमृतमहोत्सव व भारतरत्न डॉ. बाबासाहेब आंबेडकर यांच्या जयंतीनिमित्त कार्यक्रमाचे आयोजन करण्यात आले. डॉ. आंबेडकर यांच्या जिल्हाधिकारी कार्यालय येथील पुतळ्याला पुष्पहार अर्पण करुन शाहिरी भीमवंदना या कार्यक्रमाची सुरुवात झाली. यावेळी प्रबोधिनीचे अध्यक्ष शाहीर हेमंतराजे मावळे, शाहीर देवा कांबळे व युवा शाहीर उपस्थित होते. उपक्रमाचे ७ वे वर्ष होते.

जन्मले भीमराव आंबेडकर, करण्या दलितांचा उद्धार या शाहीर हेमंतराजे मावळे यांनी रचलेल्या पोवाडयातून डॉ.आंबेडकरांचे जीवन चरित्र व कार्य शाहिरांनी उपस्थितांसमोर उलगडले. भारताचे थोर शिल्पकार, भीम भास्कर, आंबेडकर वीर, भीमाई जन्म देई, भीम पराक्रमी घडला इतिहास यांसारखे पोवाडे देखील यावेळी सादर झाले. कॅम्प अरोरा टॉवर, अप्पर इंदिरानगर, पद्मावती, सिंबायोसिस सेनापती बापट रस्ता, पुणे विद्यापीठ, रेंजहिल्स, दापोडी-बोपोडी या आठ ठिकाणी पोवाडयाचा कार्यक्रम झाला. यामध्ये शाहीर देवराव कांबळे, शाहीर जालिंदर शिंदे, राजकुमार गायकवाड, गोरखनाथ खामकर,अभय भंडारी आदींनी सादरीकरण केले.