कार आणि घर महागणार, आधार-पॅन लिंक करण्यासाठी आता द्यावे लागणार 500 रुपये; आजपासून होणार हे मोठे बदल

मुंबई : आज 1 एप्रिलपासून नवीन आर्थिक वर्ष सुरू होत आहे. यासह, सामान्य लोक, बँकिंग आणि ऑटोमोबाईल क्षेत्राशी संबंधित अनेक बदल होत आहेत. घर खरेदी पासून कार खरेदी, महामार्गा वरील प्रवास इतकेच नव्हे तर सामान्यांना परवडणारी औषधेही महागणार आहेत. जर तुम्ही क्रिप्टो करन्सीमध्ये पैसे गुंतवले तर तुम्हाला त्यातून होणाऱ्या नफ्यावर 30% कर भरावा लागणार आहे.  आजपासून होणारे मोठे बादल –

• आधार-पॅन लिंक न केल्यास दंड
  पॅनला आधारशी लिंक केल्यास आता दंड आकारला जाईल. 30 जून 2022 पर्यंत 500 रुपये दंड असेल. यानंतर 1000 रुपये दंड भरावा लागेल. 
• कार खरेदी करणे महागणार
  टाटा मोटर्सने आपल्या वाहनांच्या किमती 2-2.5% ने वाढवण्याचा निर्णय घेतला आहे, तर टोयोटा किर्लोस्कर मोटरने देखील आपल्या वाहनांच्या किमती 4% ने वाढवण्याचा निर्णय घेतला आहे. याशिवाय मर्सिडीज-बेंझ इंडिया आपल्या सर्व कारच्या किमती वाढवणार आहे. BMW देखील 1 एप्रिलपासून आपल्या सर्व कारच्या किमती 3.5% ने वाढवणार आहे.
• प्रवास महागणार
   भारतीय राष्ट्रीय महामार्ग प्राधिकरणाने (NHAI) आज दुपारी 12 वाजल्यापासून टोल टॅक्समध्ये 10 ते 65 रुपयांची वाढ केली आहे. छोट्या वाहनांसाठी 10 ते 15 रुपयांनी तर व्यावसायिक वाहनांसाठी 65 रुपयांनी वाढ करण्यात आली आहे.
• परवडणारे घर खरेदी महागणार  
  आयकर कायद्याच्या कलम 80EEA अंतर्गत 1.5 लाखांच्या अतिरिक्त कपातीचा लाभ यापुढे उपलब्ध होणार नाही. आयकर कायद्याच्या कलम 80EEA अंतर्गत, जर घराची किंमत 45 लाखांपेक्षा कमी असेल, तर व्याज पेमेंटवर 1.5 लाखांपर्यंत वजावट म्हणून दावा केला जाऊ शकतो. ही वजावट किंवा सूट कलम 24बी अंतर्गत उपलब्ध असलेल्या 2 लाख रुपयांच्या सूटव्यतिरिक्त होती.
• पीएफच्या व्याजावर कर भरावा लागेल
  ज्या कर्मचाऱ्यांनी पीएफ खात्यात 2.5 लाख रुपयांपेक्षा जास्त रक्कम जमा केली आहे त्यांना व्याजावर आयकर भरावा लागेल. कर मोजणीसाठी रक्कम दोन भागांमध्ये विभागली जाईल. एकामध्ये करमुक्त योगदान आणि दुसऱ्यामध्ये 2.5 लाख रुपयांपेक्षा जास्त योगदान, जे करपात्र असेल. सरकारी कर्मचाऱ्यांसाठी ही मर्यादा ५ लाख रुपये असेल. 
• औषधे महागणार
  सुमारे 800 जीवरक्षक औषधांच्या किमतीत 10% वाढ होणार आहे. त्यात अँटिबायोटिक्स ते पेन किलर यासारख्या आवश्यक औषधांचाही समावेश आहे.