देशातील पहिले सायबर विद्यापीठ महाराष्ट्रात स्थापन करणार :  उच्च व तंत्रशिक्षण मंत्री उदय सामंत 

पुणे : “तंत्रज्ञानाचा वाढता वापर आणि सायबर सुरक्षेची आवश्यकता लक्षात घेता त्याविषयीचे प्रगत शिक्षण उपलब्ध होणे महत्वाचे आहे. देशातील पहिले सायबर विद्यापीठ महाराष्ट्रात स्थापन करण्यासाठी राज्य सरकार प्रयत्न करणार आहे,” असे प्रतिपादन राज्याचे उच्च व तंत्रशिक्षण मंत्री उदय सामंत यांनी केले. राज्यातील पहिले संतपीठ माझ्या कारकिर्दीत उभारता आल्याचे समाधान आहे, असे ते म्हणाले.

सुर्यदत्ता ग्रुप ऑफ इन्स्टिट्यूटमध्ये ‘मंत्र्यांसोबत संवाद’ कार्यक्रमांतर्गत ‘ऑनलाइन व एकत्रित शिक्षणाच्या संदर्भात सायबर सुरक्षा’ या विषयावर विद्यार्थी, प्राध्यापक आणि निमंत्रित पालकांशी संवाद साधताना उदय सामंत बोलत होते. सुर्यदत्ताच्या बावधन कॅम्पसमध्ये झालेल्या या कार्यक्रमावेळी सुर्यदत्ता ग्रुप ऑफ इन्स्टिट्यूटचे संस्थापक अध्यक्ष प्रा. डॉ. संजय चोरडिया, उपाध्यक्षा सुषमा चोरडिया, मुख्य विकास अधिकारी सिद्धांत चोरडिया, स्नेहल नवलखा, डॉ. किमया गांधी, राजकुमार सुराणा, किरण साळी, निलेश गिरमे आदी उपस्थित होते. यावेळी डॉ. एपीजे अब्दुल कलाम सभागृहाचे उद्घाटन झाले. महाविद्यालयातील विद्यार्थी व सोनाली ससार यांनी कोकणी नृत्य सादर केले. सामंत यांच्या हस्ते ‘कोकण व्हिजन २०२५’ डॉक्युमेंटचे प्रकाशन झाले. तसेच दृक्श्राव्य सादरीकरण झाले. त्यासाठी सुखविंदर कौर व अमोल गुप्ते यांनी मेहनत घेतली.