विवेक वनारसे ठरला यंदाच्या ‘द ड्राईंग बोर्ड २०२१’ या आंतरराष्ट्रीय स्पर्धेचे विजेते
नुकटेक ऑनलाईन पद्धतीने ही स्पर्धा पार पडली. यामध्ये विवेक वनारसेने प्रथम क्रमांक पटकाविला. तमिळनाडूच्या सीएआरई (CARE) स्कूल ऑफ आर्किटेक्चरच्या जसवंत एन एस व राल्बीन वेनियल यांच्या संघाने द्वितीय तर पुण्याच्याच महर्षी स्त्री शिक्षण संस्थेच्या डॉ. भानुबेन नानावटी कॉलेज ऑफ आर्किटेक्चर फॉर वूमेन (BNCA)च्या अंकिता खलाटे, श्रेया जोशी व मैत्रेयी प्रभुदेसाई यांच्या संघाने तृतीय क्रमांकाचे पारितोषिक पटकावले.
बडोदा येथील मंडला डिझाईन सर्व्हिसेसचे सहसंस्थापक व अहमदाबादच्या सेंटर फॉर एन्व्हार्नमेंटल प्लॅनिंग अॅण्ड टेक्नोलॉजी (सीईपीटी)च्या फॅकल्टी ऑफ आर्किटेक्चरचे माजी प्रमुख आर्किटेक्ट नीलकंठ छाया, सिडनी – ऑस्ट्रेलियातील पीटर स्ट्रॅचबरी आर्किटेक्चरचे पीटर स्ट्रॅचबरी आणि सीआरआयटी व स्कूल ऑफ एन्व्हार्नमेंट अॅण्ड आर्किटेक्चरच्या सह संस्थापिका आर्किटेक्ट रुपाली गुप्ते यांनी स्पर्धेचे परिक्षक म्हणून काम पाहिले. यादरम्यान आळंदी देवस्थानचे प्रमुख चोपदार राजाभाऊ रणदिवे यांनी स्थापत्य व नियोजनाच्या दृष्टीकोनाच्या माध्यमातून वारी उपस्थितांसमोर उलगडून दाखविली.
विवेक वनारसे यांनी या स्पर्धेसाठी वारीच्या राहण्याची सोय होऊ शकेल अशा पद्धतीचे मोड्यूल विकसित केले होते. वारीच्या थांब्याच्या ठिकाणी यामध्ये वारी मुक्काम करू शकेल व वारी जशी पुढे जाईल तसे हे मोड्यूल वारी सोबत असेल अशा पद्धतीने ते बनविण्यात आले. शिवाय वारीच्या मुक्कामाच्या वेळापूर या गावातील ग्रामपंचायत कार्यालय व कुंडाचे देखील त्यांनी स्थानिक स्थापत्याच्या आधारे रेखांकन केले होते. यामध्ये स्थानिक यादवकालीन स्थापत्यकलेचा अंतर्भाव करण्यात आलेला होता. लहानपणापासून वारीचे आकर्षण असल्यामुळे या संकल्पनेवर काम करताना एक प्रकारचे समाधान मिळाल्याचे वनारसे यांनी सांगितले. तसेच संतांची शिकवण आपल्या रेखाटनाद्वारे समाजासमोर आणण्याचा प्रयत्न केल्याचे आपल्याला समाधान आहे असेही वनारसे यांनी नमूद केले.