अभियांत्रिकी दृष्टीकोनातून प्रत्येकाने उपायकारक बनावे – डॉ. दीपक शिकारपूर

पुणे : “अभियंता हा समस्यांवर उत्तर शोधणारा असतो. तो क्रियाशील असतो. त्याच्यात नवनिर्माणाची क्षमता असते. अभियांत्रिकी हा एक दृष्टीकोन आहे. त्या दृष्टीकोनातून प्रत्येकाने समस्येवर उपाय शोधण्याचा प्रयत्न केला पाहिजे. याचे उत्तम उदाहरण म्हणजे गृहिणी आहे. तीदेखील एक अभियंताच असते. उपलब्ध संसाधनांचा वापर करून घराला आकार देते,” असे प्रतिपादन प्रसिद्ध संगणक तज्ज्ञ डॉ. दीपक शिकारपूर यांनी केले.

बावधन येथील सुर्यदत्ताच्या कॅम्पसमध्ये झालेल्या या कार्यक्रमावेळी विश्वेश्वरय्या सभागृहाचेही उद्घाटन झाले. प्रसंगी आयटी तज्ज्ञ डॉ. दीपक शिकारपूर, सुर्यदत्ता ग्रुप ऑफ इन्स्टिट्यूटचे संस्थापक अध्यक्ष प्रा. डॉ. संजय चोरडिया, उपाध्यक्षा व सचिव सुषमा चोरडिया, संस्थेच्या सल्लागार मंडळाचे सचिन ईटकर, ‘सूर्यदत्ता’चे मुख्य कार्यकारी अधिकारी आणि समूह संचालक प्रा. डॉ. शैलेश कासंडे,  संचालक प्रा. सुनील धाडीवाल, मुख्य विकास अधिकारी सिद्धांत चोरडिया आदी उपस्थित होते. १५० पेक्षा अधिक शिक्षक-शिक्षकेतर कर्मचारी यावेळी उपस्थित होते. अभियांत्रिकीबद्दल तीनही पुरस्कारार्थीना प्रश्न विचारात संयोजकांनी त्यांना बोलते केले.

प्रा. डॉ. संजय चोरडिया म्हणाले, “थोर अभियंता सर मोक्षगुंडम विश्वेश्वरैय्या यांचा जन्मदिवस भारतासह श्रीलंका आणि अन्य देशांत साजरा होतो. स्थापत्य अभियंता आणि म्हैसूरचे १९ वे दिवाण असलेल्या विश्वेश्वरय्या यांना स्टेट्समन म्हणूनही ओळखले जाते. देशाचा सर्वोच्च असा भारतरत्न पुरस्कार त्यांना प्राप्त झाला. जनतेच्या जगण्यावर परिणाम करणारे कार्य त्यांच्या हातून घडले होते. राष्ट्राच्या जडणघडणीत अभियंत्यांचे योगदान मोलाचे आहे.”