‘पारा गर्निका’ कार्यक्रमाचे येत्या २७ एप्रिल रोजी आयोजन

महाराष्ट्र कल्चरल सेंटरच्या अंतर्गत पुणे गॅलरी ऑफ व्हिज्युअल आर्टस् (पीजीव्हीए)च्या वतीने आयोजित करण्यात येणाऱ्या ‘पारा गर्निका’ या कार्यक्रमाद्वारे याच आक्रोशाला वाचा फोडणारी कलाकृती सादर होणार आहे. येत्या रविवार दि. २७ एप्रिल रोजी परफॉर्मन्स आर्ट प्रकारातील ही कलाकृती हिराबाग चौकात असलेल्या ज्योत्स्ना भोळे सभागृहातील पुणे गॅलरी ऑफ व्हिज्युअल आर्टस् या ठिकाणी सादर होईल. या कार्यक्रमाचे सकाळी ९ ते १०.३० आणि सकाळी ११ ते दुपारी १२.३० असे दोन प्रयोग होतील. हे दोन्ही प्रयोग सर्वांसाठी विनामूल्य खुले असून यासाठी प्रथम येणाऱ्यास प्राधान्य या तत्त्वावर प्रवेश देण्यात येणार असल्याची माहिती पीजीव्हीएचे समन्वयक प्रमोद काळे यांनी कळविली आहे.

याविषयी अधिक माहिती देताना प्रमोद काळे पुढे म्हणाले की, “एकाधिकारशाहीचा पुरस्कर्ता असलेल्या स्पेनच्या जनरल फ्रँकोने स्पेनवर आपली पूर्ण सत्ता असावी या आशेने नाझींशी हातमिळवणी केली आणि २६ एप्रिल, १९३७ साली नाझींनी गर्निका शहरावर बॉम्ब हल्ले करीत संपूर्ण शहर बेचिराख केले. यामध्ये मोठ्या संख्येने स्त्रिया, मुले, नागरिक मारले गेले. या घटनेवर आधारित प्रसिद्ध चित्रकार पाबलो पिकासो याने काढलेले ‘गर्निका’ हे पेंटिंग पुढे खूप प्रसिद्ध झाले. पारा या शब्दाचा अर्थ स्टॉप अर्थात थांबवा, यावरून ‘पारा गर्निका’ या कार्यक्रमाची संकल्पना समोर आली.”

आपण सर्वांनीच वंश, लिंग, जाती, वर्ण यांच्या नावाखाली होणारा हा आक्रोश थांबविण्यासाठी प्रयत्नशील  असले पाहिजे असा संदेश या कार्यक्रमाद्वारे आम्ही देऊ पाहत आहोत. वर नमूद विषयासंबंधी काही छायाचित्रांचे प्रोजेक्शन, कवितांचे अभिवाचन आणि प्रेक्षकांचा सहभाग असे कार्यक्रमाचे स्वरूप असून दृक, श्राव्य अशा दोन्ही माध्यमांतून प्रेक्षकांपर्यंत पोहोचण्याचा आमचा हा प्रयत्न असल्याचे काळे यांनी नमूद केले.

सदर कार्यक्रमामध्ये स्वत: प्रमोद काळे हे सहभागी असतील तर प्रसिद्ध अभिनेत्री विभावरी देशपांडे आणि नरेश गुंड हे विद्रोही कवितांचे अभिवाचन करणार आहेत. अशा प्रकारचा पुण्यातील हा पहिलाच प्रयोग असल्याचे काळे यांनी सांगितले. कार्यक्रमासाठी प्रसिद्ध कवी गणेश विसपुते यांनी भाषांतरीत केलेल्या कविता सादर करण्याची परवानगी दिली आहे हे विशेष.