कॅलीग्राफी तज्ञ प्रभाकर भोसले यांचा आम आदमी पक्षात प्रवेश

पुणे : कॅलीग्राफी तज्ञ, ‘थिंक पाॅझिटिव्ह’ मासिक व दिवाळी अंकाचे संपादक, पॉझिटिव्ह कट्टाचे संस्थापक प्रभाकर भोसले यांनी आपचे राज्य संघटक व पुणे शहर कार्याध्यक्ष विजय कुंभार यांच्या उपस्थितीत आज आम आदमी पक्षात प्रवेश केला.

प्रभाकर भोसले यांनी पुण्यातील अभिनव कला महाविद्यालयातून पदवी मिळवली आहे. कॅलीग्राफी आणि टायपोग्राफीमध्ये त्यांनी स्पेशलायझेशन केले आहे. ते गेली २७ वर्षे विविध मिडीयांसोबत डिझाइन आणि कॅलिग्राफीचे काम करत आहेत. वेगवेगळ्या इव्हेंट आणि पुस्तकांसाठी तसेच दैनिकातील पुरवण्यांसाठी आजपर्यंत सुमारे २५ हजारहून जास्त कॅलीग्राफी शिर्षके केली आहेत. संपादकिय आर्टिस्ट या पोस्टवर सकाळ पुणे येथे १६ वर्षे आर्टिस्ट म्हणून काम केले आहे. गेल्या १२ वर्षापूर्वी स्वत:चा डिझाइन स्टुटिओ चालू केला आहे.

आजपर्यंत हजारो पुस्तकांचे डिझाइन प्रभाकर भोसले यांनी केले आहे. दैनिक भास्कर, दिव्यमराठी, सकाळ, पुढारी, प्रभात या दैनिकासाठी तसेच अनेक मासिके, नियतकालिकांसाठी विविध प्रोजेक्टसाठी कॅलिग्राफी, डिझाइन आणि कॉन्सेप्टस् कन्सल्टंट म्हणून काम करत आहेत. जर्मनी हॅम्बर्ग येथील गार्सिया मिडीयाचे संस्थापक मारिओ गार्सिया ज्यांनी जगभरातील ५०० पेक्षा जास्त न्यूजपेपरची डिझाइन केली आहेत त्यांच्या गार्सिया मिडीया या कंपनी सोबत दोन वर्षे काम केले आहे. न्यूजपेपर डिझाइन, मासिके आणि विविध ब्रँड प्रमोशनमध्ये त्यांचा हातखंडा आहे. सकाळमधील प्रसिद्ध ग्राफिटी या सदरासाठी हजारो ग्राफिटींचे सुलेखन आणि शेकडो ग्राफिटींचे लेखन त्यांनी केले आहे. ग्राफिटीचे अनेक कार्यक्रम आणि प्रात्यक्षिके सादर केली आहेत. अमेरिकेत मिनियापोलीस आणि कॅलिफोर्निया येथे मराठी कॅलीग्राफि पेंटींगची प्रदर्शने केली आहेत.

थिंक पाॅझिटिव्ह या दिवाळी अंकाचे ते संपादक आहेत. गेल्या सात वर्षात थिंक पॉझिटिव्ह दिवाळी अंकाला राज्यस्तरीय प्रथम, द्वितीय क्रमांकाचे २१ पुरस्कार मिळाले आहेत. थिंक पॉझिटिव्हच्या माध्यमातून सगळ्यांनी सकारात्मक राहावे यासाठी प्रयत्न करीत आहेत. एप्रिल 2021 मध्ये थिंक पॉझिटिव्ह हे मासिकही चालू केले आहे.

अनेक शाळांमधून त्यांनी “पॉझिटिव्ह कट्टा” चालू केला असून त्यामुळे मुलांमध्ये सकारात्मक बदल दिसून येत आहेत. सकारात्मकता वाढीसाठी या कट्ट्याचा उपयोग होत आहे. भोसले यांच्या वडिलांना आणि कुटुंबाला सैन्यदलात काम करण्याची पार्श्वभूमी आहे. सिंगापूरमध्ये आझाद हिंद सेनेत त्यांच्या आजोबांनी काम केले आहे.