ज्योतिराम कदम हे कलावंत शिक्षक; बालकुमार संस्थेने ऑनलाइन सभेतून वाहिली श्रद्धांजली

पुणे : हाडाचा शिक्षक, लोककलावंत, बालनाट्य लेखकअसे हरहुन्नरी व्यक्तीमत्व असलेले ज्योतिराम कदम हे खरे कलावंत शिक्षक होते. अशा शब्दांत अ.भा. मराठी बालकुमार साहित्य संस्थेच्या अध्यक्षा डॉ. संगीता बर्वे यांनी श्रद्धांजली वाहिली.

बालचित्रवाणीचे माजी कार्यक्रम निर्माता, लेखक, दिग्दर्शक ज्योतिराव कदम यांचे नुकतेच निधन झाले. अमरेन्द्र भास्कर मराठी बालकुमार साहित्य संस्थेचे ते अजीव सदस्य होते. संस्थेच्या वतीने ऑनलाइन श्रध्दांजली सभेचे आयोजन करण्यात आले होते.

सहकार्यवाह सुनील महाजन म्हणाले, कदम यांचा पेहराव म्हणजे सलवार, नेहरू सदरा, खांद्याला शबनम असा असे. शबनममध्ये कायम त्यांनी लिहिलेली बालसाहित्याची पुस्तके असतं. ते सर्वांनाच पुस्तकांची भेट देत असतं.

कोषाध्यक्ष डॉ. दिलीप गरूड म्हणाले, निगर्वी, शालीन असे त्यांचे व्यक्तीमत्त्व होते. ते लोककलावंत होते. त्यांचा आवाज मधूर होता. कार्यक्रम सादर करताना ते मुलांना खिळवून ठेवत असतं. कदम यांच्या कन्या प्रिती शेटे, योगेश केळापूरे, बिपीनचंद्र चौगुले, निर्मला सारडा आदींनी श्रध्दांजली वाहिली.