तालचक्र महोत्सवात रसिकांनी अनुभवली डान्स बॅले आणि फ्युझन संगीताची पर्वणी
पुणे : फ्युझन वाद्यवृंदाचे मंत्रमुग्ध करणारे ताल-सूर…दमदार डान्स बॅले आणि त्यामुळे रंगत गेलेली सुरेल सायंकाळ….अशी अनोखी सांस्कृतिक पर्वणी पुणेकर रसिकांनी शनिवारी अनुभवली. निमित्त होते १० व्या तालचक्र संगीत महोत्सवाचे.
प्रसिद्ध तबलावादक पद्मश्री विजय घाटे व पुनीत बालन ग्रुप यांच्या संयुक्त विद्यमाने आयोजित या महोत्सवाचे औपचारिक उद्घाटन शनिवारी, १९ नोव्हेंबर रोजी कोथरूड येथील महालक्ष्मी लॉन्स येथे संपन्न झाले. याप्रसंगी पुनीत बालन ग्रुप ‘चे पुनीत बालन, लोकमान्य मल्टीपर्पज को – ऑपरेटिव्ह सोसायटी लिमिटेड’च्या श्वेता रानडे,बढेकर ग्रुप’चे प्रवीण बढेकर, तबलावादक पं.विजय घाटे, व्हायोलिन अकॅडमी’चे संस्थापक आणि व्हायोलिन वादक पं.अतुलकुमार उपाध्ये,व्हायोलिन वादक राजस आणि तेजस उपाध्ये उपस्थित होते. संपूर्ण कार्यक्रमाचे सूत्रसंचालन मिलिंद कुलकर्णी यांनी केले.
कार्यक्रमाच्या दुसऱ्या सत्रात संगीत मार्तंड पं. जसराज यांच्या अभिजात रचनांवर आधारित आणि प्रसिद्ध कथ्थक नृत्यांगना गुरू शमा भाटे यांची संकल्पना असलेला ‘आवत मोहन’ हा डान्स बॅले सादर झाला. नृत्यांगना गुरू शमा भाटे आणि त्यांच्या सहकाऱ्यांनी कृष्णाचे लालित्य दर्शविणाऱ्या बंदिशी नृत्य आणि संगीताच्या माध्यमातून प्रस्तुत केल्या. त्यांनी आपल्या सादरीकरणाची सुरवात ‘ आवत मोहन धेनू चराए’ या बंदिशीद्वारे केली. त्यानंतर ‘चितवन रोके हू न रही’ बंदिश, ‘ इतलारे धीम’ हा तराणा आणि राधेचे वर्णन करणारी ‘मृगनयनी को प्राण नवल रसिया मृगनयनी’ ही बंदिश सादर केली. नीरजा आपे यांनी कार्यक्रमाचे निवेदन केले. या मनमोहक नृत्य प्रस्तुतीला रसिकांनी टाळ्यांचा उस्फूर्त प्रतिसाद दिला.