कोरोना संकटात सिरम इन्स्टिट्यूटने  केलेल्या कामगिरीचा देशाला सार्थ अभिमान – उद्योग मंत्री सुभाष देसाई

उद्योग मंत्री सुभाष देसाई यांची सिरम इन्स्टिट्यूटला भेट

पुणे : सायरस पुनावाला यांच्या जिद्द, चिकाटी, मेहनतीच्या जोरावर सिरम इन्स्टिट्यूट ही संस्था उभी केली. कोरोना संकटात या संस्थेने मोलाची भूमिका बजावली आहे. त्यांच्या या कामगिरीचा महाराष्ट्रासोबतच देशाला अभिमान वाटतो, असे गौरवोद्गार उद्योग मंत्री सुभाष देसाई यांनी आज काढले.

उद्योग मंत्री देसाई यांनी सिरम इन्स्टिट्यूटला भेट देवून येथील लस उत्पादन प्रक्रियेची माहिती घेतली.  याप्रसंगी ते बोलत होते. यावेळी महाराष्ट्र राज्य औद्योगिक महामंडळाचे मुख्य अभियंता नितीन वानखेडे, प्रादेशिक अधिकारी अविनाश हदगल, संजय देशमुख, इन्स्टिट्यूटचे संचालक सतीश देशपांडे, कार्यकारी संचालक उत्पादन उमेश शालीग्राम, उपसंचालक उमेश शिरसावकर आदी उपस्थित होते.

देसाई म्हणाले, कोरोनाच्या काळात मुख्यमंत्री उद्धव ठाकरे सतत सायरस पुनवाला यांच्याशी संपर्क करीत होते. कोविड लसीमुळे आपल्याला सुरक्षितता वाटत असून नागरिक आत्मविश्वासने घराबाहेर बाहेर पडतांना दिसत आहेत. कोरोना संकटातून बाहेर काढण्यात सिरम इन्स्टिट्यूटचे योगदान महत्वपूर्ण आहे. संस्थेने यापुढेही नवनवीन तंत्रज्ञानाचा वापर करुन लस निर्मितीचे कार्य सुरुच ठेवावे, असेही ते म्हणाले.

यावेळी उमेश शालीग्राम यांनी येथील कामकाजाची माहिती दिली.