पुणे प्रार्थना समाजाच्या वतीने गरजूंना शिधा वाटप

पुणे : पुणे प्रार्थना समाजाच्यावतीने डॉ. रामकृष्ण गोपाळ भांडारकर यांच्या 184 व्या जयंतीनिमित्त समाजातील गरजूंना शिधा वाटप करण्यात आले. विविध स्तरातील 100 नागरिकांना शिधा वाटप करण्यात आले.

यावेळी पुणे प्रार्थना समाजाच्या अध्यक्षा डॉ. सुषमा जोग, चिटणीस डॉ. दिलीप जोग, व्यवस्थापक मंडळ सदस्य समीर आफताब चौधरी, विश्वस्त मीरा भरवीरकर उपस्थित होते. निराधार महिला, धुणी भांडी करणाऱ्या महिला, रस्त्यावर व्यवसाय करणारे, मजूर अड्यावरील कामगार, अपंग नागरीक यांना ही मदत करण्यात आली.

डॉ.दिलीप जोग म्हणाले, कोरोनाच्या पार्श्वभूमीवर ही मदत करण्यात आली आहे. प्रार्थना समाजाचे अध्वर्यू डॉ. रामकृष्ण गोपाळ भांडारकर यांच्या जयंती निमित्त दरवर्षी संस्थेत विविध कार्यक्रम घेतले जातात. परंतु गेली दोन वर्षे कोरोना काळात टाळेबंदी बाधितांसाठी मदतकार्य करण्यात येत आहे.