सिम्बायोसिस स्किल्स अँड प्रोफेशनल युनिव्हर्सिटी (SSPU)येथे होणार भारतातील पहिल्या ‘युनेस्को चेअर’चे (UNESCO Chair) उद्घाटन
पुणे : सिम्बायोसिस स्किल्स अँड प्रोफेशनल युनिव्हर्सिटी (SSPU), पुणे, युनेस्को पॅरिसच्या सहकार्याने, महिला सक्षमीकरणासाठी ‘जेंडर इन्क्लुजन आणि स्किल डेव्हलपमेंट’ (लिंग समावेशकता आणि कौशल्य विकास) या विषयावरील आशियातील पहिल्या युनेस्को चेअरचे उद्घाटन करून भारताच्या शिक्षण आणि कौशल्य क्षेत्रात एक महत्त्वपूर्ण टप्पा गाठण्यासाठी सज्ज आहे.
या युनेस्को चेअरचे अधिकृत उद्घाटन मुख्य अतिथी श्री. जयंत चौधरी, माननीय राज्यमंत्री (स्वतंत्र प्रभार), कौशल्य विकास आणि उद्योजकता तसेच राज्यमंत्री, शिक्षण मंत्रालय, भारत सरकार यांच्या हस्ते शुक्रवार, २४ एप्रिल २०२६ रोजी होणार आहे. हे उद्घाटन युनेस्कोच्या सहकार्याने SSPU कॅम्पस, किवळे, पुणे येथे आयोजित “विमेन लीडिंग द फ्युचर ऑफ वर्क” या आंतरराष्ट्रीय परिषदेदरम्यान केले जाईल.
या उपक्रमाचे नेतृत्व SSPU च्या प्रो-चान्सलर आणि युनेस्को चेअरहोल्डर डॉ. स्वाती मुजुमदार करत आहेत. डॉ. मुजुमदार या जागतिक स्तरावर मान्यताप्राप्त कौशल्य विकास धोरण तज्ज्ञ, B20 टास्क फोर्सच्या सदस्य आणि प्रतिष्ठित फुलब्राइट-नेहरू (FINEAS) ग्रांट (२०२४-२०२५) च्या मानकरी आहेत.
हा ऐतिहासिक उपक्रम कौशल्य परिसंस्था, तांत्रिक शिक्षण आणि कार्यबलाची सज्जता बळकट करण्याच्या जागतिक प्रयत्नांमध्ये भारताला अग्रस्थानी नेणारा आहे. युनेस्को पॅरिसच्या मार्गदर्शनाखाली स्थापित झालेली ही चेअर, कौशल्य-आधारित शिक्षण आणि रोजगाराला चालना देण्यासाठी, विशेषतः महिलांचा कार्यबलातील सहभाग वाढवण्यासाठी एक ‘सेंटर ऑफ एक्सलन्स’ आणि जागतिक ज्ञान केंद्र म्हणून कार्य करेल. ही परिषद एआय (AI), सेमीकंडक्टर टेक्नॉलॉजी आणि डिफेन्स टेक यांसारख्या उदयोन्मुख क्षेत्रांमध्ये महिलांचा सहभाग वाढवण्यासाठी कौशल्य विकासाच्या भूमिकेवर भर देईल.
परिषदेतील प्रमुख मान्यवर
मुख्य अतिथी
• श्री जयंत चौधरी, माननीय राज्यमंत्री (स्वतंत्र प्रभार), कौशल विकास आणि उद्योजकता मंत्रालय; आणि राज्यमंत्री, शिक्षण मंत्रालय, भारत सरकार.
सन्माननीय अतिथी:
• कु. आदिती वर्दा सुनील तटकरे: माननीय मंत्री, महिला आणि बालविकास, महाराष्ट्र शासन.
• सुश्री मोनिका नागेलगाड: माननीय कॉन्स्युल जनरल, नॉर्वे.
या परिषदेत जागतिक संस्थांचे नामवंत वक्ते उपस्थित राहतील:
• सुश्री मेरी ओव्हरिंग्टन: व्यापार आणि गुंतवणूक आयुक्त (दक्षिण आशिया).
• श्री. गॅब्रिएल बोर्डाडो: कौशल्य तज्ज्ञ, आंतरराष्ट्रीय कामगार संघटना (ILO).
• सुश्री सोलेदाद पातिनो: युनेस्को ग्लोबल स्किल्स अकादमी, पॅरिस.
• सुश्री प्रिसिला वांजिकू गाटोनी: युवा आणि समावेशकता कार्यक्रम अधिकारी, युनेस्को-युनिव्होक (UNESCO-UNEVOC), जर्मनी.
युनेस्को चेअरबद्दल
STEM-आधारित (विज्ञान, तंत्रज्ञान, अभियांत्रिकी, गणित) कौशल्य विकासाद्वारे मुली आणि महिलांसाठी संधी विस्तारण्यासाठी ही चेअर स्थापन करण्यात आली आहे. भविष्यकालीन कौशल्यांना चालना देणे, सर्वसमावेशक शिक्षण प्रणाली मजबूत करणे आणि महिलांना विज्ञान आणि नवोपक्रम क्षेत्रात करिअर करण्यासाठी प्रेरित करणे हे याचे मुख्य उद्दिष्ट आहे. या अंतर्गत ‘कुशल साथी’ सारख्या मार्गदर्शक उपक्रमांद्वारे विशेषतः गरजू मुलींना शैक्षणिक शिक्षणासोबतच उद्योगांचा अनुभव मिळवून देऊन सक्षम केले जाते.