पश्चिम विभागीय आंतरविद्यापीठ मुलींच्या हॉकी स्पर्धेचे पुण्यामध्ये आयोजन !!
पाच राज्यांतील ५१ विद्यापीठांचे संघ सहभागी होणार !!
पुणे सावित्रीबाई फुले पुणे विद्यापीठ आणि खडकी येथील टिकाराम जगन्नाथ महाविद्यालय यांच्या संयुक्त विद्यमाने पश्चिम विभागीय आंतरविद्यापीठ मुलींच्या हॉकी स्पर्धेचे पुण्यामध्ये आयोजन करण्यात येणार आहे. स्पर्धेत पाच राज्यांतील सुमारे ५१ विद्यापीठ संघ सहभागी होणार असून ही स्पर्धा पुण्यातील विविध हॉकी मैदानावर दि. २६ ते ३० डिसेंबर या कालावधीत होणार आहे. सावित्रीबाई फुले पुणे विद्यापीठाच्या गेल्या ७६ वर्षांच्या इतिहासामध्ये मुलींच्या पश्चिम विभागीय हॉकी स्पर्धेचे आयोजन पहिल्यांदाच होत आहे.
स्पर्धेचे सामने सावित्रीबाई फुले पुणे विद्यापीठ, पिंपरीतील मेजर ध्यानचंद हॉकी मैदान, चिखली येथील एसएनबीपी महाविद्यालय मैदान आणि खडकी येथील रेल्वे पोलिस मैदानावर स्पर्धेचे सामने रंगणार आहेत. स्पर्धेतील विजेत्या आणि उपविजेते ठरणाऱ्या संघांना करंडक देण्यात येणार आहे. तसेच स्पर्धेचा सर्वोत्कृष्ट खेळाडू, सर्वोत्कृष्ट गोलरक्षक, स्ट्रायकर, मध्यरक्षक आणि बचावपटू अशी वैयक्तिक पारितोषिकेही देण्यात येणार आहेत, असे स्पर्धेचे समन्वयक टिकाराम जगन्नाथ महाविद्यालयाचे शारिरीक शिक्षण संचालक डॉ. महेश बेंडभर यांनी सांगितले. या स्पर्धेच्या संयोजन आणि नियोजन टिकाराम जगन्नाथ महाविद्यालय, त्यातील शिक्षक, शिक्षकेतर कर्मचारी आणि खडकी शिक्षण संस्थेचे सर्व पदाधिकारी यांनी केले आहे.
स्पर्धेचे उद्घाटन सावित्रीबाई फुले पुणे विद्यापीठाचे कुलगूरू डॉ. सुरेश गोसावी तसेच एसएनबीपी ग्रुप ऑफ इन्स्टिट्युटच्या संचालक वैशाली भोसले यांच्या हस्ते होणार आहे. या स्पर्धेत महाराष्ट्रातून मुंबई विद्यापीठ, गडचिरोली विद्यापीठ, आरटीएम नागपुर विद्यापीठ, आहिल्याबाई होळकर विद्यापीठ सोलापुर, कोल्हापुर शिवाजी विद्यापीठ, केबीसीनॉर्थ महाराष्ट्र विद्यापीठ जळगांव, डॉ.बाबासाहेब आंबेडकर, छत्रपती संभाजीनगर, सावित्रीबाई फुले पुणे विद्यापीठ असे विद्यापीठांचे संघ सहभागी होणार आहेत.